Kon serio nos ta di bèrdat

Den reunion públiko di parlamento ku a trata presupuesto 2023, ministernan ta pidi parlamento pa trese kambio por medio di amienda pa algun kos spesífiko i kual ta afektá pueblo tambe.

Den e kaso aki Frakshon di MAN a presentá un amienda kaminda ta pone 1.3 mion florin èkstra pa ABC busbedrijf, esaki ta despues ku minister Cooper a hasi un súplika na parlamento pa hasi uso di su outoridat (budgetrecht) pa pone fondo disponibel. Tambe e situashon na nos Universidat kual mester di èkstra fondo a pone 1.7 mion èkstra. 

Lamentablemente Koalishon no a bai di akuerdo ku e amienda despues ku minister di Finansa no tabata di akuerdo pa kita sèn for di SOAB ku ta bai pa paga amigunan consultant. Esei a pone ku e 13 miembronan ku ta sostené gobièrnu kueste loke kueste a vota kontra. Pero ta sali pafó boka grandi bisa ku kurason ta bati pa pueblo i ta gobièrnu di pueblo pa pueblo. 

Spera e koalishon di kara pa enfrentá e pueblo, e trahadó di ABC, tur hende ku ta usa konvoi di ABC, Studiantenan di nos Universidat i dosente/trahadó di universidat ku KOALISHON MFK I PNP a vota kontra èkstra sèn pa ABC i Universidat pa faboresé amigunan Consultant.

Moshon

Moshon pa trese klaridat riba refineria: Koalishon MFK PNP ta vota kontra.

Moshon pa trese pakete di alivio riba oumento di kosto di bida: Koalishon MFK PNP ta vota kontra.

Moshon pa no bini ku medida kaminda pueblo mester bai paga gastunan médiko: Koalishon MFK PNP ta vota Kontra

Moshon pa yuda personanan ku problemátika di awa i koriente i bin ku kampaña pa konsientisá riba uso di awa i koriente: Koalishon MFK PNP ku eksepshon di Elvin Gerard ta vota kontra.

TA ESAKI TA GOBIÈRNU DI PUEBLO PA PUEBLO?