KRALENDIJK, Bonaire
Kolegio Ehekutivo a reakshoná kontentu riba e Plan di Maneho pa Naturalesa i Medio Ambiente Hulanda Karibense 2020-2030 ku minister di Agrikultura, Naturalesa i Kalidat di Kuminda a publiká dia 24 di aprel último. Kolegio Ehekutivo ta hopi di akuerdo ku e dokumento ku ta karga komo título ‘Plan pa tera i awa’. Ku rason nan ta enfatisá e karakter úniko di flora i founa di nos isla i nifikashon di esakinan pa prosperidat i bienestar di pueblo boneriano den e plan. E ambishonnan di gabinete i e ministerionan enbolbí pa protehá naturalesa di Boneiru mas mihó ainda i kaminda ta nesesario rekuperá esaki, ta konektá perfektamente ku e plan di naturalesa insular ku resientemente Kolegio Ehekutivo a presentá na Konseho Insular pa aprobashon. E medidanan tambe ku e ministerionan a proponé ta kompletamente den liña ku e metanan di e Plan di Naturalesa Boneiru.
Kolegio Ehekutivo tin un remarke si relashoná ku e ròl ku gabinete ke enkargá Entidat Públiko Boneiru kuné pa loke ta trata e parti di ehekushon. Kolegio Ehekutivo ta aploudí e nivel haltu di ambishon ku e plan ta ekspresá, pero na mes momentu ta eksistí serka Kolegio Ehekutivo e miedu ku nan ta eksigí di mas di Entidat Públiko Boneiru pa loke ta trata finansa, forsa laboral i ekspertisio. Den su reakshon ofisial riba e plan Kolegio Ehekutivo lo transmití e preokupashon aki pa gobièrnu hulandes.
Asina ku e situashon relashoná ku e pandemia di corona ta pèrmití esei Kolegio Ehekutivo lo supliká gobièrnu hulandes alabes pa pone un ‘kwartiermaker’ disponibel ku ta yuda konkretisá kiko nan ta ferwagt eksaktamente di Entidat Públiko Boneiru pa loke ta trata finansa, forsa laboral i ekspertisio. E Plan di Naturalesa insular por sirbi komo base pa esei, i esaki ta un motibu pakiko Kolegio Ehekutivo ta spera ku Konseho Insular riba término korto ta yega na aprobashon, di manera ku por bai den konsulta ku e ministerionan enbolbí tokante e ehekushon.
Na e momentunan aki tur atenshon i energia ta dirigí riba salú públiko i aliviamentu di e impakto sosial i ekonómiko di e krísis di corona, pero Kolegio Ehekutivo ta kere ku lo ta bon pa mas lat den e aña aki organisá un konferensia di mesa rondó pa organisashonnan lokal di naturalesa i medio ambiente i otro interesadonan, kaminda e personanan ku a hinka e Plan di Maneho di Naturalesa i Medio Ambiente den otro tambe ta partisipá.
