For di dia ku a introdusí e impuesto di turista 1 di yüli 2022, Entidat Públiko Boneiru (EPB) a generá un montante di 940.000 dòler na entrada. Ta bai usa e sèn pa proyektonan relashoná ku turismo ku ta benefisiá komunidat di Boneiru, manera por ehèmpel mehorashon di infrastruktura, piskamentu i tipo di kosnan asina. E proyektonan akí ta inkluí kaba den e presupuesto di 2022.
E periodo ku ta bini, EPB huntu ku stakeholdernan turístiko ta hasi un evaluashon profundo relashoná ku funshonamentu di e impuesto nobo di turista. Despues di esaki, Kolegio Ehekutivo ta hasi proposishon pa mehorashon na Konseho Insular pa kambio di e ordenansa aktual. “Un di e puntonan di mehorashon ta prevení ku bishitantenan, asina yamá ‘island hoppers’ ku ta biaha algun dia pa un otro isla, na yegada na Boneiru tin ku paga e impuesto atrobe. Esaki nunka no tabata e intenshon di e impuesto nobo di turista manera nos a proponé esaki na Konseho Insular aña pasá”, diputado Hennyson Thielman ta duna di konosé.
Posibilidat di pago
Pa motibu di e introdukshon aselerá di e impuesto nobo di turista, na e momentu akí por paga ainda solamente ku karchi di krédito via e sistema online. Na sèptèmber ta amplia esaki ku iDEAL, PayPal i otro métodonan di pago hopi usá. Biaheronan ku ta paga na aeropuerto, si por paga ku tur sorto di karchi di krédito i di débito. Kèsh no ta posibel. EPB ta enfatisá ku e plakanan ta bai direktamente riba kuenta di banko di e departamentu di finansa di EPB.