Entidat Públiko Boneiru a kumpra Plantashi Fòntein, un kunuku grandi i stratégiko di 302.700 hèktar ku awendia ta dividí den 3 kavel. E kompra akí ta habri porta pa konservashon di naturalesa i proyektonan sostenibel na Boneiru.
Un tempu Plantashi Fòntein tabata un área agríkola yen di bida. Awor akí Entidat Públiko Boneiru a kumpra e tereno pa $ 3,4 mion, ku un aporte di $ 2,4 mion di ministerio di Agrikultura, Naturalesa i Kalidat di Kuminda. Aunke e tereno a pèrdè su gloria agríkola di ántes, e ta keda un bunita sitio. E edifisionan bieu i e naturalesa bírgen ta brinda un oportunidat úniko pa agrikultura i rekreashon sostenibel.
Kompra di Plantashi Fòntein ta resultado i negosiashonnan i kolaborashon profundo entre diferente interesado na Boneiru. E esfuerso konhunto akí no solamente a kondusí na kompra eksitoso di e tereno, pero tambe e ta hiba Boneiru un paso mas serka realisashon di su ophetivonan ambisioso pa medio ambiente. E ta brinda nos isla un oportunidat pa krese na un manera sostenibel, kaminda su bunitesa i rekursonan natural ta keda konservá pa futuro generashonnan.
Diputado Thielman a ekspresá su orguyo: ‘Awe, despues di hopi esfuerso i negosiashon, nos por ta orguyoso ku nos por entregá e tesoro natural akí na Boneiru.’ El a pone énfasis riba importansia di e kompra akí pa futuro di Boneiru. ‘Atkisishon di Plantashi Fòntein ta marka un logro importante pa Boneiru, den direkshon di un futuro mas sostenibel i mas bèrdè.’