Faltando apenas algun dia pa kompetensia, partisipantenan di e kompetensia literario anual “Arte di Palabra Boneiru” ta hasiendo e último ahuste pa asina por ta fuerte djasabra awor. E aña aki e kompetensia konosé dos tipo di grupo, esta esun tradishonal kual ta hóbennan di skol avansá i komo primisia e hóbennan di grupo 8 di skolnan básiko. En total un kantidat di 23 partisipante.
Preparashon pa e kompetensia ta kulminando ya asina e partisipantenan por deleita e públiko i kompetí ku bunita obra. Tim di hurado tambe ta kalentando pa asina husga diferente obra ku bini dilanti. Komishon di Arte di Palabra Boneiru i Sekshon di Kultura, Arte i Literatura (SKAL) ta reglando e último detaye dje programa di e kompetensia. Ekipo di zonido i imagén ta kasi klá ku e parti tékniko di e dia. Pa no lubidá, e “coach’’ i mayornan tambe ta den tapara pa sostené i motivá e partisipante pa hasi nan máksimo esfuerso durante e kompetensia. En fin, preparando pa un enkuentro kaminda diferente obra lo trese goso, memoria i harmonia serka tur ku ta bai disfrutá di e kompetensia.
Den tur 4 kategoria, esta poesia eksistente, poesia original, kuenta eksistente i kuenta orginal, tin partisipashon. Partisipantenan di Grupo 8 di skolnan básiko ta Ellyena Janga, Giandra Martis, Trevor Anthony, Raygione Wout, Makaesha Makaya, Keithley Torregrosa, Kaylee Winklaar, Arlene Statie, Maycy Trenidad, Kyrsten Martis, Misheily Alcantara. Partisipantenan di skol avansá ta Yeminah Maria, Juriëlla Josephia, Jeaniro Dorothea, Emily Frans, Q-Zeally Piar, D’annge Sint Jago, Ramso Coffie, Maria-Luisa Troncon, Irlenska Martinus, Nathaniel Paulo, Alicia Anthony.
Pueblo di Bonaire ta invitá pa disfrutá di e obranan di Arte di Palabra Bonaire durante e kompetensia djasabra awor 23 aprel 2022 kual ta inisiá 10’or di mainta na Mangazina di Rei. Entrada pa un i tur ta grátis. Tambe tin e posibilidat pa sigui e kompetensia virtual via Nostv i via página di “facebook’’ di Arte di Palabra Boneiru.
E aña aki e kompetensia ta dediká na sra. Emma Sint Jago. Sra. Sint Jago ta un baluarte ku ta aportá na engrandesé nos literatura na papiamentu pa medio di kanto i kansionan kultural. Tambe sra. Sint Jago ta enkabesá i forma parti di e organisashon Grupo Tutti Fruti kual tambe tin komo meta pa tene nos kultura bibu den forma di kanto i kansion.
Tema pa aña 2022 ta “Honro na den seku”. Tur aña ta skohe un tema riba tereno di kultura pa asina eduká partisipantenan riba e tema. E aña aki a skohe e tema “Honor na den seku” pa pone atenshon na e tradishon di tokamentu i refleha e riba e balor ku esaki tin pa kultura i historia di Boneiru.
Arte di Palabra ta un kompetensia di deklamashon na Papiamentu pa hóbennan den enseñansa avansá na Aruba, Boneiru i Kòrsou. Ta trata di un kompetensia anual i tin komo meta pa desaroyá talento literario hóben i literatura hubenil na Papiamentu pa medio di deklamashon di poesia i kontamentu di kuenta. Riba kada isla ta tuma lugá un kompetensia pa asina skohe e obranan ganadó pa bai kompetí ku hermana islanan. Den kuadro di esaki, Boneiru ta tene su kompetensia pa aña 2022 djasabra awor 23 di aprel 2022.
