NUKEB den asosiashon ku Bonaire Human Rights ta organisa un tayer di trabao diadomingo awor 27 Juni na Captn Don’s Habitat: “Train the Trainer” – Sa e berdat enkuanto relisting riba lista di Teritorionan-Sin-Propio-Gobernashon di Nashonan Uni. E tayer di trabao lo wordu presenta den terminologia simpel I lo splika e abc di e proseso di relisting riba e lista di Teritorionan-Sin-Propio-Gobernashon di Nashonan Uni I kon relisting di Boneiru por yuda desaroya Boneiru i su pueblo pa medio di e Komite Spesial di Dekolonisashon di Nashonan Uni , yama C24.
E obhetivo di e tayer di trabao, Train the Trainer ta pa ekipa mas lidernan di nos komunidat ku e konosementu I informashon pa sigui plama, komparti e informashon bao di henter Boneiru pa asina den futuro serkano tur nos suidadanonan por sa I komprende ku nos uniko solushon pa nos situashon ta Nashonan Uni I su lista di Teritorionan-Sin-Propio-Gobernashon. Dor di usa e trajektoria aki, e derechonan di e pueblo lo ta proteha pa e institushonan aki I tambe lo empodera I duna e pueblo speransa pa un mihor futuro I bida riba nan isla.
NUKEB a wordu funda na final di anja pasa 2020, despues ku a finalisa e Evaluashon den ki grado Boneiru tin gobernashon-propio segun normanan internashonal rekonosi, ku a determina ku Boneiru ta kai bao di e minimo di e normanan di Nashonan Uni I ley internashonal di propio-gobernashon. NUKEB , e komite ehekutivo ta konsisti di James Finies di NKBB, Davika Bissessar di Bonaire Human Rights, Sedney Marten komo suidadano, Robby Beukenboom di Frente Sosial Progresivo, Suzy Thode di Union Revolushonario Boneriano I Aljano Emerenciana di Un Union Pa Pueblo, ku e obhetivo pa traha huntu pa pone Boneiru bek riba e lista di Teritorionan-Sin-Propio-Gobernashon di Nashonan Uni.
E tayer di trabao lo wordu tene na Capt Don’s Habitat – Orario: 9am pa 12pm I di 1pm pa 5pm. Registrashon ta posibel via email: nkbb.bek@gmail.com. Kosto pa e tayer ta $25 ku ta inklui snacks, drinks, lunch I un sertifikado di partisipashon.