Resientemente, Komishón pa Supervishon i Protekshon di Dato Personal BES (CBP BES) a realisá un inspekshon na Entidat Públiko Boneiru (na hulandes, OLB) pa kontrolá implementashon di e maneho clean desk i clear screen, ku ta forma parti di e maneho di OLB “Op weg naar bewustwording informatieveiligheid”. E inspekshon a saka na kla ku no a implementá e maneho den su totalidat i ku ainda protekshon di dato personal den organisashon di OLB no ta na un nivel adekuá.
Konforme Lei di Protekshon di Dato Personal BES (Wbp BES), OLB tin deber di protegé dato personal adekuadamente, tantu riba tereno organisatorio komo tékniko. Esei ta enserá, entre otro, ku dokumento i fail ku ta kontené dato personal no por ta aksesibel pa persona no outorisá. E maneho clean desk i clear screen ta un paso importante pa garantisá protekshon di dato personal.
CBP BES a konstatá ku no ta tur direktorado di aparato públiko ta na altura di e maneho akí, i ku na e direktoradonan ku sí ta na altura, e grado di implementashon opservabel ta limitá. Segun CBP BES, un faktor ku ta hunga un ròl importante den e kuadro akí ta e guia ku Kolegio Ehekutivo, Sekretario Insular i e direktornan mester ofresé.
E resultadonan di e inspekshon ta suprayá e importansia di atendé ku dato personal na un manera kuidadoso i e nesesidat di hisa e nivel di siguridat di informashon den aparato públiko. CBP BES ta animá OLB pa sigui e rekomendashonnan i tuma e medidanan nesesario pa garantisá konfidensialidat di e datonan personal ku e ta prosesá.
Den su rapòrt, CBP BES ta hasi diferente rekomendashon pa mehorá protekshon di dato i promové implementashon di e maneho di OLB, entre otro: nombra un funshonario di privasidat, introdusí un sistema pa prent dokumento na un manera sigur i fiha instrukshon kla pa protekshon di kòmpiuter i otro aparato ku ta karga dato.
CBP BES ta pidi Kolegio Ehekutivo i Sekretario Insular pa implementá medida konkreto, denter di seis luna, pa koregí e situashon.
CBP BES ta rekomendá pa implementashon di e rekomendashonnan relashoná ku clean desk i clear screen tuma lugá den fase. Pa e aspektonan di riesgo haltu, e terminó ta 1 di òktober 2023. Pa e aspektonan di riesgo ménos haltu, OLB tin tempu te 1 di mart 2024.
Roëlla Pourier, di Sekretariado di Komishon pa Supervishon i Protekshon di Dato Personal, ta suprayá e importansia di protekshon di privasidat: ‘Pa garantisá konfiansa di siudadania den e institutonan di gobièrnu, ta esensial pa esnan ku ta atendé ku dato personal hasi esei ku e debido kuidou. Nos ta kontentu di mira ku Entidat Públiko Boneiru ta tumando medida pa implementá e rekomendashonnan den nos rapòrt i nos lo sigui vigilá e desaroyonan ku sumo atenshon. Kolaborashon i konsientisashon ta e yabi pa garantisá privasidat i siguridat di e datonan personal di nos siudadanonan.’
