E minister hulandes pa Bibienda Popular i Ordenamentu Teritorial, Hugo de Jonge, riba djabièrnè 18 di yüni a hasi un bishita na Komishon di Hür Boneiru. E mandatario a papia ku presidente, sekretario i miembronan di e komishon di hür tokante entre otro e preshon grandi ku tin riba merkado di hür.
Un di e puntonan di atenshon ta disponibilidat di kas di hür pagabel pa término largu. Nan a papia tambe tokante e tendensianan ku e komishon di hür ta mira den e petishonnan pa informashon ku ta drenta i e kasonan i seshonnan di mediashon ku entretantu nan a tene. Den e tempu binidero Komishon di Hür Boneiru huntu ku Entidat Públiko Boneiru i e ministerio hulandes ta sigui hiba konsulta pa realisá e posibel puntonan di mehorashon.
Komishon di Hür Boneiru a keda instituí i e ta aktivo for di meimei di aña 2021, despues ku e legislashon nobo di hür a drenta na vigor. E ta un organisashon imparsial pa prevení, yuda solushoná i formalmente regla konflikto entre e doño di kas i e persona ku ta hür kas serka dje. Ku dunamentu di bon informashon e komishon di hür ta enfoká riba prevenshon di konflikto. Den kaso ku e doño di kas i e persona ku ta hür kas serka dje huntu no ta logra solushoná e konflikto, e ora ei e komishon di hür ta ofresé yudansa ku informashon imparsial. Si esaki no trese un solushon, e ora ei pa medio di evaluashon di e konflikto hasiendo uso di legislashon i regulashon, por duna un veredikto ku ta obligatorio pa ámbos partido.
Komishon di Hür Boneiru ta duna veredikto entre otro tokante preis di hür den kaso di un akuerdo di hür nobo, oumento i/òf redukshon di hür, gastunan di servisio, kanselashon di akuerdo di hür i stipulashon irasonabel den un akuerdo di hür. Pa mas informashon tokante Komishon di Hür Boneiru por bishitá e wèpsait: www.huurcommissiebonaire.com. Aki por download e formulario tambe ku por usa pa mèldu un kaso i e kalkuladó di preis di hür ku kua por kalkulá altura di e preis di hür.
