Vice Atmiral Tas, Komandante di Forsanan Naval (C-ZSK), i Komandante Hansen, Direktor Wardakosta Region Karibe, a firma e Kombenio renobá entre Ministerio di Defensa i Wardakosta den Region Karibe. Ministerio di Defensa den esaki ta keda representá pa C-ZSK. E kombenio ak, ku kada tres aña ta keda aktualisá, ta regla akuerdo di apoyo i koperashon mutuo entre ámbos organisashon.
E kombenio ta prepará pa legalmente registrá i fasilitá e koperashon entre Ministerio di Defensa i Wardakosta. E ta deskribí prestashon di servisionan di apoyo den region Karibe pa diverso dependensia di e Komando di Forsanan Naval i otro komponente di Defensa. Tambe e ta deskribí e proseduranan kon pa abordá i resolvé problemanan di apoyo mutuo.
Ounke Wardakosta ta un Organisashon independiente, e ta keda intensivamente sostené pa Defensa i mirá komo un parti integral di CZSK. Ku frekuensia personal di Defensa ta keda fasilitá pa funshonnan spesífiko, i e barku di patruyahe di Defensa, inkluso e helikòpter di abordo, ta keda desplegá di forma planifiká pa operashonnan di Wardakosta. Di otro banda Defensa por hasi uso di Unidatnan di Wardakosta, tal manera e avion di Wardakosta. E koperashon aki a resultá spesialmente efikas den e lucha kontra transportenan di droga riba laman.
E sosten na Wardakosta ta keda suministrá spesialmente pa Komandante di Forsanan Naval den Region Karibe (C-ZMCARIB). Sede prinsipal di Wardakosta ta establesí na Base di Marina Parera na Kòrsou, djis banda di e sede prinsipal di C-ZMCARIB. E funshon di C-ZMCARIB ta keda kumplí pa Komandante Hansen, ku tambe ta okupá e funshon di Direktor di Wardakosta.
E kombenio renobá aki ta reforsá e estrecho koperashon i koperashon operativo enter Defensa i Wardakosta, pa medio di kua seguridat i efikasia di operashonnan den Region Karibe por ser mehorá aun mas.