KRALENDIJK, Bonaire
Entidat Públiko Boneiru i ministerio di Infrastruktura i Maneho di Awa (I&W) a pone un siguiente paso pa loke ta trata profeshonalisashon mas aleu di maneho di haf. Ku esaki realisashon di e ambishon di Kolegio Ehekutivo pa desaroyá un haf di karga nobo ta bini mas serka.
Djamars último diputado Elvis Tjin Asjoe i minister Cora van Nieuwenhuizen Wijbenga den presensia di gezaghebber Edison Rijna a firma un ‘Kombenio di koperashon Hafnan di Laman Boneiru’ na Den Haag, Hulanda. Ku e koperashon aki entre otro ta konfirmá importansia di sigurá un atendementu adekuá i seif di tráfiko marítimo. ‘Pa Boneiru ta alkansabel pa barku, e isla ta dependé kompletamente di un infrastruktura i kapasidat adekuá di haf pa un atendementu seif i rápido di nabegashon, suministro di nos isla i stimulashon di desaroyo ekonómiko ’, asina por lesa den e kombenio.
‘Pa atendé na un manera seif, rápido i duradero ku tráfiko marítimo ku ta yega i sali di Boneiru ta nesesario pa e organisashon nóutiko profeshonalisá mas aleu i ku ta organisá Boneiru su infrastruktura di forma adekuá i duradero pa futuro ’, segun e kombenio. Den su kombersashon ku e minister, diputado Tjin Asjoe a pone énfasis riba importansia grandi di bon fasilidat di haf. Esakinan no solamente ta kontribuí na desaroyo ekonómiko, pero ta hasi posibel tambe pa den futuro laga barkunan grandi di kònteiner nabegá dirèkt pa Boneiru. Esaki por tin un efekto bentahoso riba gastunan di transporte di produktonan ku mester importá.
Gezaghebber Edison Rijna a mustra riba e aspekto di siguridat na momentu ku separá barkunan krusero i barkunan di karga i ora ku den futuro trasladá e kònteinernan i hiba nan pafó di Kralendijk. Hasiendo esaki ta deshasí tambe di e molèster den sentro di siudat di tráfiko di karga ku ta hiba i trese kònteiner.
Riba potrèt: Ku firmamentu di un kombenio di koperashon Kolegio Ehekutivo i ministerio di Infrastruktura i Maneho di Awa ta pone un siguiente paso den mehorashon di infrastruktura i maneho di haf.
Na momentu di publikashon di e potrèt por fabor menshoná: Foto Nico van der Ven
