Dia 30 di mei 2023 pa 9 or di mainta Kolegio Elektoral a vota pa Eerste Kamer. Unánimamente tur hende a vota pa representashon di parti di Partij van de Arbeid i e kandidato Jeroen Recourt den Eerste Kamer. E eskoho di voto pa e number 2 riba lista di kandidato di PvdA ta pa motibu di su afinidat fuerte ku área karibense i su konosementu profundo.
Importansia di e votashon unánime akí ta ku e partisipashon den Eerste Kamer no ta fragmentá. I ku den e forma akí e voto di Boneiru ta konta mas pisá. Den esaki Kolegio Elektoral a forma un solo frente despues di un konsiderashon kuidadoso i stratégiko. Na nòmber di Boneiru tur miembro a vota pa PvdA ku bista riba e puntonan di salida ku ta kuadra mas mihó ku Boneiru su interes i ku ta den liña ku e agènda di prioridat 2023 – 2027 di Kolegio Elektoral. Unánimamente Kolegio Elektoral a fiha e prioridatnan ku ta biba den nos poblashon, manera implementashon ku urgensia di un mínimo sosial, den esaki.
Tantu PvdA komo Groenlinks a mustra atenshon serio i sinsero na e elekshon den Kolegio Elektoral di Boneiru. Ku regularidat miembronan di e partidonan akí ta na Boneiru i na kaminda pa 30 di mei nan tabatin vários enkuentro tambe ku Kolegio Elektoral. Aktualmente e kombinashon di PvdA i Groenlinks ta ademas un faktor di poder importante den polítika hulandes, den e balansa entre partidonan derechista i iskierdista, pa motibu ku den Eerste Kamer e koalishon di VVD – D66 – CDA – Christen Unie por forma un mayoria tantu ku BBB (Boer Burger Beweging) na e parti derechista komo ku Pvda – Groenlinks na e parti iskierdista.
E kolegionan elektoral tin influensia riba konstelashon di Eerste Kamer, komparabel ku e miembronan di Provinciale Staten na Hulanda Oropeo. E islanan di Hulanda Karibense ta entidatnan públiko i no ta pertenesé na un provinsia. Ku yegada di e kolegionan elektoral, kontrali na ántes, awor akí nan ta yuda determiná ken ta drenta den Eerste Kamer.
Elekshon di e miembronan di Eerste Kamer, ku nan ta yama senado tambe, ta tuma lugá kada kuater aña. E miembronan di Provinciale Staten i e kolegionan elektoral di Boneiru, Sint Eustatius i Saba i e kolegio elektoral pa no-residentenan ta skohe pues e miembronan di Eerste Kamer.