Riba proposishon di diputado Elvis Tjin Asjoe Kolegio Ehekutivo a disidí pa nombra un asina yamá ‘change-team maneho finansiero’. Pa esaki a sera un akuerdo ku e empresanan Ernst & Young Caribbean i Union Groove.
Meta di e kolaborashon ta pa mehorá kalidat di maneho finansiero interno di Entidat Públiko Boneiru strukturalmente di tal forma ku dentro di korto tempu kuentanan anual ta kumpli ku tur eksigensia pa bini na remarke pa un deklarashon aprobá pa un akountent. Ku e aserkamentu nobo aki den sierto grado ta tuma despedida di e ‘plan di mehorashon’ ku a formulá riba insistensia di Kolegio di supervishon finansiero.
Konstatando ku tabatin muchu tiki progreso relashoná ku ehekushon di e plan di mehorashon, Kolegio Ehekutivo a pidi e konsehero finansiero di gobièrnu di Saba i Boneiru, señor Piet Gerritsen, pa traha un ‘quick scan’ di e situashon. A base di su konklushonnan i rekomendashonnan a tuma e desishon pa forma un ‘change-team’ ku tin komo tarea pa strukturá i salbaguardiá e proseso interno – inkluso e koperashon entre departamentu di Finansa i Direktoradonan -, ku komo meta final ku kalidat di e kuentanan anual di Entidat Públiko Boneiru den futuro ta di tal forma ku pa regla nan ta kumpli ku tur rekisito pa risibí un deklarashon aprobativo di akountent.
E aserkamentu nobo tin aprobashon di ministerio di Asuntunan Interno i Relashonnan den Reino. E ministerio aki lo kubri tambe e gastunan di e ‘change-team’ (aproksimadamente $ 400.000), asina sekretario di estado Raymond Knops a primintí.
Diputado Tjin Asjoe: ‘Dia mi a sinta komo diputado mi a konstatá ku den e añanan anterior tabata tin muchu tiki progreso. A adaptá e plan di mehorashon, pero no a logra e efekto deseá. For di e investigashon di señor Piet Gerritsen a bini dilanti ku tabata enfoká muchu riba kumpli na tempu ku obligashon di raportahe na Kolegio di supervishon finansiero – Cft. Pa e motibu aki a pèrdè e meta general ku ta mas prinsipal for di bista. Awor nos ta bòltu e aserkamentu: nos ta bai hinka mas energia i tempu den mehorashon di e proseso mes, kaminda e konsekuensia lógiko ta ku por entregá e raportahenan strukturalmente na tempu serka Kolegio di supervishon finansiero – Cft i Konseho Insular, pero tambe ku e kontenido ta na òrdu. Nos no ta pidi e ‘change-team’ rapòrtnan nobo, pero un aserkamentu pragmátiko, pa logra resultado konkreto ku por midi. Ta bini entre otro mas tayer pa fortifiká e koperashon entre departamentu di Finansa i e Direktoradonan. Esaki pasobra prestashon di departamentu di Finansa ta dependé pa un grado importante di entrega di informashon korekto i na ora di parti di otro departamentonan. Mi ta spera ku e proseso ku nos ta bai drenta awor ta kondusí na e realisashon ku un bon maneho finansiero ta responsabilidat konhunto di henter e aparato públiko i Kolegio Ehekutivo.”