Riba djabièrnè 24 di novèmber último Kolegio Ehekutivo ku hopi plaser a kuminsá ku su aktualisashon semanal pa pueblo. Ku e aktualisashon semanal Bon Informá via livestream Kolegio Ehekutivo ta duna inisio na un era nobo di transparensia i frankesa.
Den su aspirashon pa yega na komunikashon mas efektivo ku siudadanonan i pa engrandesé enbolbimentu di komunidat, tur siman Kolegio Ehekutivo lo duna un bista general di asuntunan pendiente, desishonnan importante i plannan pa futuro. Por sigui e aktualisashon semanal akí riba Facebook i kanalnan di YouTube ofisial di entidat públiko Boneiru i ta kompartí nan tambe via diferente medio di komunikashon.
Bon Informá lo tuma lugá tur djabièrnè di 14:00 or pa 15:00 or, kaminda ta duna informashon ku mas profundisashon, kontestá pregunta di prensa i informá pueblo direktamente. E konferensianan di prensa akí lo ta aksesibel tantu físikamente komo online, di manera ku periodistanan lokal tin posibilidat pa partisipá aktivamente.
Kolegio Ehekutivo ta di opinion ku transparensia i frankesa ta esensial pa un demokrasia salú i un gobernashon íntegro ku ta funshoná bon. Mediante aktualisashonnan regular ta aspirá pa yega na un mihó komprendementu di toma di desishon i maneho, i ta enbolbí komunidat den un forma mas aktivo ku e prosesonan ku tin influensia riba nan bida diario.
Na nòmber di Kolegio Ehekutivo, diputado Clark Abraham a deklará: ‘Nos ta kere ku kompartí informashon i skucha preokupashonnan i sugerensianan di nos siudadanonan ta krusial pa gobernashon efektivo. Ku e aktualisashon i konferensia di prensa semanal akí, nos ta aspirá pa establesé un standart nobo di transparensia i forma un brùg entre gobièrnu i komunidat.’
Aspirashon di Kolegio Ehekutivo ta pa huntu ku pueblo i prensa yega na un komunidat kaminda tur hende ta sinti nan skuchá i kaminda ta tuma desishon ku bienestar di nos siudadanonan komo e prioridat di mas haltu.
