Kolegio Ehekutivo ta yuda habitantenan ku durante e krísis di corona a haña nan mes den problema grandi. Ta trata di trahadónan ku a pèrdè nan trabou i entrante 1 di yanüari 2021 no ta bini na remarke mas tampoko pa sosten segun e areglo di supsidio temporal gastu di salario i pèrdida di entrada Hulanda Karibense.
Debí na e krísis di corona awor aki ta mas difísil pa haña otro trabou. Pa e motibu aki tin un kantidat di hende ku ta menasá di haña nan mes den un situashon problemátiko. Esaki ta konta por ehèmpel tambe pa esunnan ku pa motibu di sirkunstansianan personal nan entrada di ònderstant no ta sufisiente òf ku no ta bini na remarke pa ònderstant.
Diputado Hennyson Thielman: ‘Ta trata di ko-suidadanonan ku a duna un aporte na nos komunidat i ku awor ta sin entrada. Komo Kolegio Ehekutivo nos ke hasi esfuerso pa kaminda ta posibel sostené e grupo aki ku trabou temporal, di manera ku tòg nan tin entrada te ora ku turismo bolbe bèk na normalidat kompletamente atrobe.
Diputado Nina den Heyer: ‘Ònderstant no ta un tarea insular, pero kombatimentu di pobresa si. Algun siman pasá nos a habri e jobcenter ‘Plenchi di Trabou’. Mishon di Plenchi di Trabou ta pa trese demanda i oferta riba merkado laboral serka otro i kaminda ta nesesario ofresé hendenan ku ta buska trabou treinen, rekapasitashon i guia personal. Esaki ta oumentá nan chèns pa haña un trabou adekuá. Nos a hasi nos mes e siguiente pregunta: e tim di Plenchi di Trabou por nifiká algu pa desempleadonan ku pa motibu di e krísis a haña un gòlpi mas duru ku otronan?’
No opstante e kaida di turismo, di manera ku un kantidat di sektor tin ménos vakatura, tin otro tipo di trabou útil na nos isla. ‘Pensa riba limpiamentu di nos barionan i playanan, fèrfmentu di edifisionan di gobièrnu òf trabou di duna sosten na e programa di bakunashon’, segun Thielman. ‘Huntu ku servisionan di gobièrnu i otro organisashonnan ta kreando proyektonan, pa kua durante 3 te 6 luna tin mester di trahadó. Mientrastantu e jobcenter aktivamente ta bai buska kuponan di trabou adekuá i permanente. Mi ta hasi un yamada tambe riba dunadónan di trabou pa pensa kreativamente si nan no tin djòp temporal i mèldu nan mes na Plenchi di Trabou.’
E oferta no ta sin kompromiso, asina Den Heyer a enfatisá: ‘Nos ta hasi un invershon den e hendenan aki i pa esei nos ta verwagt bèk ku nan ta traha ku motivashon. Sierto trabounan lo no bini bèk rápidamente, p’esei nos ta bai ofresé rekapasitashon pa duna hendenan ku ta buska trabou mas chèns pa sektornan ku ta rekuperá promé. Esunnan ku durante e añanan tras di lomba a duna un aporte na desaroyo di nos isla, por duna un kontribushon importante tambe na rekuperashon di nos komunidat.’
Kolegio Ehekutivo ta realisá su mes ku no por yuda tur hende ku un trabou temporal. Entidat Públiko Boneiru ta hasi esfuerso sí pa yuda mas tantu hende posibel ku ta buska trabou ku e areglo transitorio.
Habitantenan ku ta buskando trabou (temporal) por mèldu nan mes na Plenchi di Trabou na Kaya L. D. Gerharts number 12. Nan ta alkansabel tambe na number di telefòn 715 8346.
