Philipsburg, St Maarten
Recientemente Secretario di Estado pa Asuntonan Interno y Relacionnan di Reino Raymond Knops tabata di bishita na Corsou y Sint Maarten. Relaciona cu esaki y preguntanan haci na dje, el a manda un relato pa Tweede Kamer. Den esaki ta para cu e no ta mira cu Sint Maarten tin avance pa cumpli pa haya e ayudo financiero di Hulanda, mientras cu na Corsou cu el a keda asombra pa e pobresa grandi existente.
Pa cuminsa cu Sint Maarten, desde e reunion di Conseho di Minister di Reino di dia 10 di juli ultimo, no a haya ningun reaccion for di Sint Maarten cu tin e sosten politico pa e proposicion pa bini cu un entidad cu ta bay monitorea e ayudo cu Hulanda ta ofrece. El a menciona un contra proposicion cu e isla a haci riba e Consensusrijkswet, cu a keda trata durante e reunion di CdM d Reino dia 14 di agugustus. Pa Hulanda, Knops a splica Tweede Kamer, e punto di salida ta keda e pakete presenta dia 10 di juli. Un pakete bon studia y cual a yega na dje cu participacion di diferente departamentonan gubernamental Hulandes. “Mientras cu Sint Maarten no bay di acuerdo cu e puntonan cardinal di e pakete, un combersacion fructifero no ta posibel.”
Banda di esaki, den e relato haya for di Cft den e reunion di 14 di augustus a resulta cu Sint Maarten no a ni cumpli cu e condicionnan pa e di dos tranche di ayudo di likides. “Esaki ta motibo cu Conseho di Minister di Reino a dicidi cu no ta cuminsa combersacion ainda cu Sint Maarten riba e di tres tranche di apoyo di likidez. Si Sint Maarten kier e combersacion aki, nan mester demostra via di Cft na Conseho di Minister di Reino cu nan a cumpli cu tur e condicionnan di e di dos y di tres tranche.”
CORSOU
Knops tabata dos dia di bishita na Corsou, y mescos cu na Gobierno a sostene combersacionnan cu Gobierno y instancianan priva relaciona comercio, pero tambe cu esnan cu ta duna un man pa yuda e población cu alimento den e tempo di dificil aki a causa di Covid-19.
Knops a splica cu e tabata kier a mira pa sum es e efectonan di e crisis y papia cu habitantenan, companianan y NGO-nan pa mira con e situacion ta. Y splica tambe kico Hulanda ta haciendo. A mustra cu kier yuda Corsou pa lo largo nan por carga nan autonomia di un miho forma. Pa logra esaki mester bini reformanan necesario cu ta pidiendo pa hopi tempo caba.
A mustra riba e ayudo Humanitario cu Hulanda ta dunando y apoyo riba tereno di medicina.
Inclusive Knops a reuni cu Obispo Secco, gradiciendo pa loke iglesia ta haci pa comunidad, pa e gruponan vulnerabel. A bishita e Banco di Cuminda y Cruz Cora. Asina el a haya un splicacion con via di diferente NGO ta suministra vouchernan di cuminda . Casi 20% di e poblaciobn di corsou ta depende di e ayudo aki. “Mi a keda impresiona pa e trabou di e organisacion y voluntarionan cu traha pa suministra e ayudo aki.” El a bishita diferente bario, y a papia di e ayudo cu ta dunando pa cuminsa. “Combersacionnan tabata hopi interesante. Pero lamentablemente mi a constata un pobresa alarmante.”
E seriedad di e problema a bini dilanti tambe den su reunion cu stakeholdernan di mundo commercial. E ta sinti e compromiso pa traha pa un miho futuro pa Corsou. Un futuro unda e autonomia di berdad ta haya su contenido. Pa logra esaki mester crea e condicionnan. Tambe e ta kere cu tin inversionnan posibel cu por crea cuponan di trabou necesario
Den su encuentro cu e sindicatonan a mustra nan cu tur hende mester contribui pa mustra solidaridad cu e cantidad grandi di personanancu no tin trabou aworaki. Esaki pa motibo cu sindicatonan no kier pa reduci den salario di nan miembronan. A mustra nan tambe cu e man cu Hulanda ta saca pa yuda ta pa hunto cu Corsou haci e reformanan necesario pa e isla por carga su autonomia di un miho forma.
Tambe el a reuni cu Prome Minister Rhuggenaath y Minister di Desaroyo Economico y a constata cu Gobierno di Corsou ainda no por bay di acuerdo riba e oferta di Hulanda y cu ta sigui cu e combersacionnan riba nivel di ambtenaar.
