Klousura tur afó di e proyekto “Lamanta pa wezi” di Kousa Prome

Marshe di Artesania di  Kousa Prome 

Djasabra awor 17 di desèmber lo tin un grandioso  marshe di artesanía organisá pa Kousa Promé na su sede na Duminguitu Papayaweg 14. E partispantenan ta entre otro kursistanan ku djabièrnè último 9 di desèmber a risbí nan sertifikado pa e kurso Lamantá pa Wezi. Na e okashon aki a hasi apertura di un eksposishon di e obranan di e partisipantenan. 

Ta trata aki di un kurso di Formashon Emansipatorio Práktiko pa artesano ku tabatin un durashon di seis luna. Dosente profeshonal sra. Irene Martha tabata enkargá ku e lèsnan. Un kantidat di 31 kursista a logra kaba e kurso ku éksito. E kursistanan a siña diferente téknika i nan a siña traha vários materia prima. Ku e konosementu i práktika aki nan a krea nan propio obranan. 

Un di e partisipantenan, Aishel Sambo a splika e balor agregá i e enorme kontribushon ku e proyekto tin pa desaroyo di pais i ku Kousa Promé mester sigui ku tipo di kursonan aki. 

E Marshe

Djasabra dia 17 di desèmber 2022, Kousa Promé ta organisá e MARSHE KRIOYO DI ARTESANIA kaminada e artesanonan ta presentá nan obranan. Públiko tin oportunidat di kumpra obranan di nos propio artesanonan i tin oportunidat pa pueblo en general bin apresiá e bunita obranan di nos artesanonan den e eksposishon. E marshe ta habrí for di 8’or di mainta te atardi 4’or na Papayaweg # 14 na Dominguitu na Sede di Kousa Promé. Bini i bin sostené nos artesanonan.