Susesor di Frans van Efferink a hasi apertura di aña eskolar 2022-2023 pa SGB Bonaire. Klaske Apperloo ta sigui Frans. Klaske tin mas ku 30 aña di eksperensia den enseñansa. Di VO te MBO i den diferente funshon. Na Hulanda el a traha por último komo presidente di hunta di direktiva na MBO Rijnland. Komo partidario grandi di siñamentu personalisá, el a implementá algun trayekto pionero na Hulanda. Un ehèmpel di esaki ta organisá enseñansa di tal manera, ku alumno-/studiantenan por siña den nan mes tèmpo, kaminda no ta apliká e sistema di klas pa aña mas. Banda di esei, trahamentu huntu den e laso amplio pa Klaske ta kondishonal pa por laga alumno-/studiantenan probechá optimalmente di enseñansa.
Kraskijkers
“Interes di alumno-/studiante mester ta e punto di salida den tur kos ku nos ta hasi òf disidí”, segun Apperloo. “Lamentablemente di naturalesa hende ta basta un kraskijker. Ku esei mi ke men, ku tur kos ku bai robes òf ta negativo ta haña mas atenshon. Hopi biaha esei ta guli mayoria tempu di enseñansa, ku tur konsekuensia. Pasobra un mucha ku risibí atenshon lo enforsá motibu di e atenshon ei. Pa e motibu ei ta nesesario pa nos ta mashá konsiente di nos komportashon komo adulto den esaki. Nos ta mira ainda kiko sí un mucha por hasi? Nos ta mira ainda kiko ta su talentonan? Nos ta kapas pa fortalesé e talentonan i loke e mucha ta bon den dje? Despues di tur kos, kada mucha/hende tin talento. Dediká atenshon na esaki i pone énfasis riba dje, ta benefisiá e mucha muchu mas. Un bunita metáfora den esaki ta e historia real kaminda un hòmber konfundí a raska Nachtwacht di Rembrandt van Rijn na 1975. Rijksmuseum a posponé e plannan di restourashon pa algun aña. Esaki, pa motibu ku for di henter mundu hende tabata bini Rijksmuseum pa wak e krasnan riba Nachtwacht. Volúmen di negoshi di Rijksmuseum a mas ku dupliká den e periodo ei. No tabata wak bunitesa di e kuadro mas, pero solamente e daño. Pa e motibo ei e término kraskijker. Den trato ku mucha tambe nos tin e tendensia ei. Nos sa esei, pero kada bes di nobo atenshon pa loke no ta bai bon ta slùip drenta. Ta un kuestion di praktiká hopi ku otro i realmente kere i transmití ku bo ta mira oportunidat i posibilidat pa e mucha. Kere mi, sa pasa regularmente ku mi tambe ainda, ku mi ta laga komportashon negativo di un alumno/studiante influensiá mi. Ora esei pasa mi, gustosamente mi ta aseptá korekshon.”
Start
Klaske Apperloo a start 1 di ougùstùs último komo Presidente di e Hunta di maneho i ta sinti su mes na kas na Boneiru i na SGB. “Ta un deseo di mi di hopi tempu pa biba na Antias. Ora e oportunidat a presentá, mesora mi a gara e chèns huntu ku mi kasá Aad Apperloo. Na Hulanda nos a laga 3 yu adulto, un suegro i un suegra atras. Nan tur konosé nos deseo i di kurason ta konsedé nos na biba i konstruí un bida nobo aki na Boneiru. Na febrüari otro aña, nos ta spera nos promé ñetu. Un bon motibu pa bai Hulanda atrobe pa un siman. Pero nos ta regresá sigur, nos ta bira opa i oma na Boneiru! Mi ta konta riba un kolaborashon largu i fruktífero i ta konvensí ku huntu ku mi kolega atministradó Mark Volmerink i tur kolega di Scholengemeenschap Bonaire, lo mi por sigui optimalisá e kalidat di enseñansa.”58 aña, a studia siensia di komportashon i atministrashon públiko (bestuurskunde). Enseñansa ta un pashon, sambuyá i lesa ta un hòbi.Banda di kuminda dushi mester di un bon kèlki di biña!
Klaske Apperloo a start prome di ougùstùs último komo Presidente di e Hunta di maneho
