– Diasabra 28 di september, 2024, Kiwanis Club of Palm Beach
conhuntamente cu Wit Gele Kruis a reparti 17 Child Car Seats na famianan den
necesidad. Ta bon pa menciona cu ta di 22 aña cu ta yuda famianan yega na un Child
Car Seat pa seguridad di nos muchanan riba careteranan di Aruba.
Manera costumber, Wit Gele Kruis ta screen y selecta e famianan y ta comunica e
necesidad na Kiwanis Club of Palm Beach pa cuminsa e proceso di compra. Na
momento cu tin tur cos cla, ta selecta e fecha di reparticion y Wit Gele Kruis ta informa
e famianan pa nan pasa busca nan Child Car Seat. Manera e ultimo 21 añanan, e
reparticion a bai den un bon ambiente, hunto cu e famianan y e muchanan, caminda a
reparti 17 Child Car Seats na un balor di casi 6 mil florin.
Kiwanis Club of Palm Beach ta hopi contento cu e reparticion aki caminda cu e
seguridad di e muchanan ta na prome lugar. No por keda sin duna danki na Wit Gele
Kruis, Little Kingdom y tambe na e sponsornan, boluntarionan y sostenedornan di
eventonan manera Masquerade Party, F&B tent riba ruta di Carnaval y Night Golf
caminda cu tur fondo recauda ta bai 100% bek den comunidad.
Kiwanis Palm Beach ta pertenece na e organisacion global Kiwanis Internacional cu ta
un instancia caritativo dedica na haci nos mundo mihor door di cambia un comunidad
pa medio di un mucha cada bes. Mas informacion por haya riba:
www.facebook.com/kiwanispalmbeacharuba of nos pagina di web:
www.kiwanispalmbeach.com.
