Den un ambiente casual cu e tema Spaño pa e anochi, a instala e directiva nobo pa e aña Kiwanistico 2023-2024 di Kiwanis Club of Aruba (KCA). E anochi tabata uno sumamente ameno cu presencia di representantenan di e otro clubnan di servicio di Aruba manera Lions Club, Aruba One Happy Island Lions Club, Rotary Club, Women’s Club, Quota Club y invitadonan di honor. Tambe e clubnan di e famia di Kiwanis na Aruba tabata presente; Kiwanis Club of Palm Beach, Kiwanis Club Young Professionals of Aruba y Kiwanis Club of San Nicolas,
E anochi a cuminsa cu nos himno “Aruba Dushi Tera” presenta pa e famoso cantante Angela Croes cu su mini band “Alma Gitana”, sigui cu presentacion di e poema ‘Gratitude’ door di señor Luciano Milliard.
A honra dos miembro di Kiwanis Club of Aruba cu un reconosemento meresi yama “Legion of Honor Award”. E reconocemento ta pa duna un atencion special na e añanan di servicio como miembro cu dedicacion na mehora e club y nos comunidad. Sr. Leslie Tweeboom a celebra 40 aña di servicio como miembro di KCA y Sr. Fernando Rigaud a celebra 25 aña di servicio como miembro di KCA.
E tres miembronan nobo cu a wordo instala ta Marouska Heyliger, Shurayma Dania, y Zayron Wever.
E ceremonia di instalacion di miembronan nobo, despedida di directiva anterior y instalacion di e directiva nobo a wordo conduci pa “Distinguished Lieutenant Governor” Patrick Melchiors representando “Lieutenant Governor” Shelly-Ann McPherson-Price di Kiwanis Club of Scarborough Tobago cu no por tabata presente. Presidente saliente Jokoeza Hooplot a cuminsa na bisa cu e tabata un honor pe pa por a presidi e club pa dos anja consecutivo. E a gradisi tur hende cu a aporta na e projectonan di e club durante su anjanan como presidente di e club. A despedi di e miembronan di e directiva anterior gradiciendo nan pa nan trabou y esfuerso durante e aña Kiwanistico cu a caba.
E directiva nobo cu a wordo instala ta consisti di: Manaaf Badloe como Presidente, Tessely Koolman-Ranis como Presidente Electo, Indra Pereira como Vice Presidente, Norma Brinkenberg como Secretaria, Natalie Solognier como Tesorera y Jokoeza Hooplot como Presidente Saliente. Como director a wordo instala: Derchlien Dijkhoff, Ingmar Ramharakh, Fernando Rigaud, Ebby Schwengle y Gay Spellen.
Den su prome discurso Presidente Manaaf a elabora riba su enfoke pa e aña venidero cu ta inclui yuda nos muchanan cu recurso pa nan yega nan meta, trese mas miembro pa e club, aporta na programanan cu ta yuda cu cuminda y paña pa muchanan den necesidad como tambe mehora e interaccion cu e comunidad riba e trabou cu Kiwanis ta haci. Despues di su discurso a reconoce e siguiente miembronan: Jane Wever como “Kiwanian of the Year” y Jokoeza Hooplot cu e “President’s Award”.
E miembro y invitadonan por a disfruta di un tremendo cuminda y bebida típico Spaño cu ta un paella y sangria. E entretenimiento musical spaño tabata na encargo di “Alma Gitana”.
E club ta gradici e miembronan como tambe tur esnan cu a aporta di un manera of otro na cada un di e projectonan na bienestar di esnan cu mester di ayudo den nos comunidad y ta spera di por sigi conta riba nan sosten den e aña venidero.
Kiwanis Club of Aruba ta forma parti di Kiwanis International cu ta un organisacion global di boluntario dedica na mehora mundo “one child and one community at a time” y tin como lema: sirbiendo e muchanan di mundo. Pa mas informacion di Kiwanis Club of Aruba por bishita nan pagina web na www.kiwanisclubofaruba.org of nan pagina di social media.
