Yen di desaroyo nobo i eksitante, for di introdukshon di eksperensia despues di bahada di solo i evento di ‘wellness – bienestar’ te apertura di un butikhotèl nobo i un bistro ku ta sirbi platonan favorito lokal, na aña 2023 Boneiru ta primintí di bira un trènt pa biaheronan ku ta en buska di sitionan úniko.
Boneiru, ku serka sambuyadónan pa hopi tempu kaba ta konosí komo un di e sekretonan mas mihó warda den Karibe, a kuminsá manifestá su mes komo un isla ku ta ofresé muchu mas ku solamente ref di koral protehá, awa kristalino i un ‘bucketlist’ pa amantenan di bida bou di laman. Na aña 2022 World Food Travel Association a proklam’é komo kapital kulinario, e esena kulinario kresiente den kombinashon ku un infrastruktura turístiko den desaroyo, entre otro un portal pa impuesto di turista bon organisá i aktividatnan aparte di sambuyamentu ku ta popular serka bishitantenan, manera landsailing, wentsùrf, kore baiskel i eksplorá kueba, tur esaki ta sòru ku ta bale la pena pa bishitá e isla akí. Resientemente Boneiru a lansa tambe su promesa di destinashon, The Bonaire Bond, kaminda ta resultá ku nos isla ta sigui hasi esfuerso pa preservashon di e presioso pida paraíso akí i na mes momentu ta atraé biaheronan ku e mesun afinidat. Sostenibilidat semper kaba tabata parti di karakter di nos isla, pero e destinashon a sinti e nesesidat pa amplia nan dedikashon na bishitante i komo sosten na e inisiativa akí lo adoptá vários palu di koral na nòmber di tur hende ku firma e ‘Bond’ te ku Dia di Mama Tera 2023. Komo resultado di un aña kaminda Boneiru tabata ful den notisia, segun ForwardKeys nos isla a keda menshoná komo un di e destinashonnan karibense ku ta kresiendo mas rápido den popularidat.
Den futuro Boneiru lo realisá un variedat di oferta ku ta kompleta e bunita eskape ‘fuera di loke ta komun’ akí. Desaroyonan nobo ta entre otro:
Esena kulinario
Bagel & Bloom ta habrí for di luna di mei 2022 i nan ta ofresé un eksperensia di ‘high tea’ na e sitio mes òf na un sitio di bo eskoho.
E sitio nobo pa kuminda krioyo na Rincon ku (mayoria biaha) hende lokal ta bishitá, Cactus Fence, ta habrí solamente riba djadumingu pa lùnch i ta un mùst pa platonan sukulento, manera stobá di kabritu i piská salu.
Cadushy Distillery, ganadó di un premio internashonal, a instalá un planta nobo di destilashon den e Teater Cinelania bieu, pa kumpli ku e pedida ku a oumentá pa eksportashon di su produktonan pa Oropa. Na okashon di produkshon di su di 100.000 bòter di e likùr boneriano Cadushy, e destileria a emití un edishon di hubileo ku ta únikamente disponibel na Cadushy Distillery na Rincon.
Otro aperturanan resien ta The Bonaire Coffee Bar, habrí diariamente for di 7.00 – 19.00 or, Boertiek, e di tres F&B-outlet na nos isla di Jonnie & Therese Boer na Delfins Beach Resort, kaminda nan ta sirbi kòfi, batido i sèntwich, i Meet and Eat, un ‘funky’ restorant i bar yen di ambiente situá den un patio. Ademas, Ingridients, e restorant mashá gustá ku bista riba laman na Buddy Dive Resort, a habri awor pa lùnch for di 12:00 te 15:00 or. E ‘trendy’ Ocean Oasis Beach Club awor akí ta propiedat di Pascal Beeren, un Michelin-shèf ku dos strea ku ta konosí pa su restorant De Bokkedoorns na Hulanda. Captain’s Table ta un otro restorant nobo ku ta bai habri fin di 2022 na Boneiru.
Akomodashon
Belnem House Bonaire, un butikhotèl nobo nobo ku segun ekspektativa ta habri na kuminsamentu di aña 2023, ta un akomodashon na kosta ku apartamentonan moderno i luhoso i vários ‘penthouse’ i ‘suite’ ku tèras i un pisina kompartí.
Art Hotel Bonaire, un hotèl nobo ku 14 kamber den kurason di Playa. E tin un fachada kolorido i e Tostibar, un restorant propio ku ta sirbi kuminda oropeo.
Resientemente Courtyard Marriott Bonaire Dive Resort a habri WhatSup Water Sports Centre ku ta ofresé paseo riba boto, deporte akuátiko privá, wakeboard, waterski, towables, snòrkel ku skuter di laman, stand-up paddle i ekipo di buseo.
Programa i eksperensia
Terramar Museum ta dediká na 7000 aña historia di Boneiru i área karibense. Ta amplia i renobá e kolekshon, ku mas atenshon pa eksposishon ku ta atraé tantu habitantenan lokal komo turista i ku tayer pa mucha i hende grandi. E kolekshon nobo mester ta kla na aña 2023.
Home of the Muse, un fasilidat nobo pa tayér, ‘creative retreat’, masterclass i presentashon di teater den aire liber ku nan a habri ofisialmente den luna di ougùstùs 2022.
E kompania di ‘tour’, H20 Visions Bonaire, resientemente a lansa un ‘Snacks of Bonaire’-tour: un kombinashon di historia di nos isla i e estilo di bida lokal ku bishita na restorantnan chikitu den aire liber pa kos di bebe i kuminda den diferente bario na Boneiru.
Bonaire Landsailing Adventures awor akí ta ofresé kareda den oranan djanochi for di 18:00 – 22:00 or. Aparte di esaki Bonaire Landsailing ta bai introdusí un programa di mentorado / stazje pa hóbennan boneriano i nan ta bai desaroyá mas ‘combo tour’ pa kombiná landsailing ku Cave Tours Bonaire i 4 Wheel Drive pa henter un dia di plaser.
Nobo pa e temporada di 2022 – 2023 di Bonaire Bird Photography Tours ta pa durante henter un dia wak para den Parke Nashonal Washington-Slagbaai inkluso desayuno i un lùnch estilo piknik. Gosa durante henter un dia di ekspertisio di un guia lokal, ku ta mustra bo e mihó sitionan pa wak para den e paraíso di para akí. Tin vèrekeiker tambe disponibel.
Nan ta kore e Bee Caribe’s The Street Art & Street Food Tour ku skuter eléktriko di 0-emishon di Green Bikes, pero por hasié ku outo tambe. Durante e ‘tour’ kolorido akí bou di propio guia e partisipantenan mes por disidí e velosidat ku nan ta kore e ruta i na unda nan ta kome, miéntras nan ta siña tokante e proyekto di ‘Street Colors’ i kuminda krioyo. Bee Caribe a introdusí un Island Escape Game Tour tambe, ku ta invitá bishitantenan pa wak sitionan di interes miéntras na kaminda nan ta solushoná pùzel ku finalmente ta kondusí nan na un lokalidat skondí.
Banda di esaki awor akí Bonaire Kiteschool ta ofresé lès di wing foil bou di guia (pa tur hende) na Atlantis Beach, miéntras Epic Tours a agregá dos tour nobo ku catamaran, entre otro un Sail & Dive Catamaran Tour i un Snorkel & Grill-tour ku ta dura 4 ora. GoLokal Walking Tours Bonaire ta pasa ku bo banda di monumentonan históriko i kultural durante un plasentero kaminata den e kolorido Kralendijk. AB Dive, ku awor akí ta traha kompletamente riba pènel solar, resientemente a amplia su fleta di outo di hür i awor akí ta ofresé un eksperensia di Sail & Dive inkluso sambuyamentu dos biaha bou di guia, un sena di barbekiu durante bahada di solo i mas.
Oferta di ‘wellness’
Awor akí yoga i otro aktividatnan di ‘zen’ ta disponibel na Bind, un sentro holístiko di ‘wellness’.
Aktualmente nan ta ofresé Morning Ocean Yoga na Sorobon Beach Resort, huntu ku seshonnan di masashi den un ‘beachhut’ na aire liber.
Evento den 2023
Den verano di 2022 nos isla a organisá su promé festival di ròm. Den luna di yüni 2023 e Siman di Ròm Boneiru ta bini bèk.
Den luna di yüni 2023 lo tene e festival inaugural di yoga di Boneiru den kolaborashon ku partnernan di ‘wellness’, sentronan di yoga i spa na nos isla.
Bonaire TeK!, e di 11 evento anual tékniko di buseo ku ta dura 1 siman, yen di presentashon, demonstrashon i buseo tékniko ta tuma lugá den Buddy Dive Resort for di 30 di sèptèmber te 7 di òktober 2023.
E di 21 Annual Swim to Klein Bonaire, e isla chikitu inhabitá dilanti di kosta di Boneiru ta tuma lugá atrobe den luna di sèptèmber 2023 pa rekoudá fondo pa Jong Bonaire.
Mas aktualisashon i apertura
Na fin di aña 2022 Pascal van Empelen a habri un sentro di buseo nobo: Scuba Elite.
Boutique Hotel Sonrisa Bonaire tin un doño nobo i nan ta renobá e suite-nan ku baño i muebel nobo. Nan ta amplia e restorant pa risibí personanan ku no ta wéspet tambe awor. Tin un sitio di laba profeshonal pa ekipo di sambuyamentu (konstruí segun instrukshonnan di STINAPA) kaminda wéspetnan por laba nan ekipo di sambuyamentu. Tin tambe tanki di aire i nitrox pa sambuyá i un selekshon spesial di outo di hür.
Banda di esaki resientemente a renobá Bonaire Oceanfront Apartments, situá den sentro di Kralendijk, inkluso dekorashon di e apartamentonan di dos kamber.
