Kico ta Dia Mundial di Medio Ambiente?

• Dirigi pa United Nations Environment Program (UNEP-Programa di Naciones Uni pa Medio Ambiente) y celebra cada 5 di junio desde 1973, Dia Mundial di Medio Ambiente ta e plataforma mundial mas grandi pa concientisacion ambiental y celebra pa miyones di persona den henter mundo. E aña aki Suecia ta e pais anfitrion pa e celebracion mundial.

 

TEMA PA 2022: #OnlyOneEarth

• Un Solo Tera
  • Den universo tin biyones di galaxia
    Den nos galaxia tin biyones di planeta
    Pero tin #UnSoloTera
    Laga nos cuide.

Nos Tera ta enfrentando un triple emergencia planetaria:

• e clima ta calentando demasiado rapido pa ser humano y naturaleza adapta;
• perdida di habitat y otro presionan ta nifica cu un estimado 1 miyon especie ta menaza pa extincion;
• polucion ta continua venena nos aire, tera, awa y laman.

E manera pa sali for di e dilemma aki ta pa transforma nos economianan y sociedadnan pa haci nan mas inclusivo, husto y mas harmoniza cu naturaleza. Nos mester cambia di daña nos planeta pa sana nos planeta. E bon noticia ta cu nos ta dispone di e tecnologia pa logra esaki y cu e gastonan envolvi bahando continuamente.

#UnSoloTera ta e campaña pa Dia Mundial di Medio Ambiente pa 2022, y ta exigi di nos accion transformador y colectivo na un nivel mundial pa celebra, proteha y restora nos planeta.

• Di unda e tema #UnSoloTera a sali?

“Only One Earth” (Un Solo Tera) tawata e slogan pa e promer United Nations Conference on the Human Environment, teni na Stockholm, Suecia na 1972. E conferencia aki a pone e tema di desaroyo sostenibel riba e agenda global y a conduci na creacion di Dia Mundial di Medio Ambiente. Cincuenta aña despues, Suecia ta organisa Stockholm+50 riba 2 y 3 di juni y riba Dia Mundial di Medio Ambiente, 5 di juni.

 

• Haci un forma di bida sostenibel nos promer opcion

Opcionan berdaderamente transformador pa logra sostenibiidad mester ta disponibel, pagabel y atractivo pa hende tuma decisionan diario cu ta contribui na crea un bida mas sostenibel.

Areanan clave pa e transformacion aki ta con nos ta construi nos vivienda, edificionan y lugar di trabou, oracion, con y den kico nos ta inverti nos placa, y kico nos ta haci pa recreo, diversion y entretenimento. Pero factornan di un magnitud mas grandi tambe ta inclui: energia, sistemanan di produccion industrial, comercio global, transporte y proteccion di biodiversidad.

Hopi di e opcionan aki por ser crea solamente pa entidadnan mas grandi: gobiernonan nacional y subregional, institucionan financiero, corporacionan, organisacionan internacional y otro organisacionan cu tin e poder pa cambia of scirbi di nobo reglamentonan, legislacion, crea e cuadronan pa maneho y accion y habri caminda pa horizonte y oportunidad nobo.

 

A pesar di esaki, personanan individual y sociedad civil ta keda defensornan fundamental, sostenedor y agente pa concientisacion pa e publico en general. Mas nos alza nos voz, enfatisa kico mester ser haci, y kende ta responsabel pa haci esaki, mas lihe nos ta logra introduci e cambionan necesario.

Sosteniendo Dia Mundial di Medio Ambiente 2022 y e campaña #OnlyOneEarth, #UnSoloTera, bo contribucion lo yuda asegura cu e planeta unico y bunita aki ta keda un hogar comodo pa humanidad y tur ser viviente riba Tera.

 

 

SITUACION NA ARUBA

E problema principal di Aruba encuanto medio ambiente ta falta di instrumento huridico pa regula cuido di medio ambiente y naturaleza, particularmente e falta di un ordenanza nacional pa medio ambiente (Landsverordening Milieubeheer).

Hopi tratado internacional di medio ambiente ainda no a ser implementa na Aruba. Y yen di legislacion existente ta deficiente. E lista ta largo:

1. No tin Landsverordening Milieubeheer, ni legislacion pa estudio di impacto ambiental, proteccion di aire, tera y laman contra polucion
2. No tin un Landsverordening Maritiem Beheer pa fiha, regla, proteha y monitorea nos 40.000 km2 di zona exclusivo economico riba laman y rikezanan mineral den fondo den e area aki
3. Convenio pa Diversidad Biologico falta protocol pa implementa
4. Basel Convention on the Control of Transboundary Movements of Hazardous Wastes and their Disposal NO ta implementa
5. Stockholm Convention of Persistent Organic Pollutants NO ta implementa
6. Vienna Convention for the Protection of the Ozone Layer NO ta implementa
7. Convention for the Protection of the Marine Environment of the Wider Caribbean (Cartagena Convention) ainda falta pa implementa e importante LBS Protocol, Land-based Sources Protocol, cual ta regula polucion likido y solido cu ta yega laman procediente di actividad riba tera (hopi al caso den asunto di planta di purificacion di awa na Bubaliplas)
8. United Nations Framework Convention on Climate Change, Kyoto Protocol y Paris Agreement, ningun di nan a ser ratificia y implementa na Aruba, siendo cu nan ta vital pa atende cu cambio climatico y pa logra cumpli cu e Obhetivonan di Desaroyo Sostenibel (SDGs).
9. Un Parke Marino cu ta deficiente ya cu e no ta cubri full e costa rond di e isla di Aruba y e awanan teritorial.
10. Un Plan di Ordenacion Teritorial (ROP) y reglamentonan di zonificacion (ROPv) yen di buraconan cu ta permiti desvia di stipulacionan, ora Ministro haña bon pa haci un excepcion.

 

Fuera di e falta di instrumento huridico, falta instancia pa control debido di tur asunto ambiental.

Alabes Gobierno ta culpabel di a duna un monton di permiso pa proyectonan na unda no ta conduci NINGUN estudio di impacto ambiental segun normativa internacional, sea defini den tratadonan (particularmente Cartagena Convention) y of respetando leynan local manera Ordenanza Nacional di Proteccion di Naturaleza (Landsverordening Natuurbescherming).

Y finalmente Gobierno ta ignora e interesnan of necesidadnan di asina yama Major Groups and other Stakeholders, defini pa Naciones Uni pa sinta den dialogo cu Gobierno pa participacion den tumamento di decision pa desaroyo sostenibel, violando e proceso basico di e SDGs.