Dia 23 di oktober ultimo a tuma lugar e kick-off oficial di AVB-NL na e tereno di entrenamiento
renová di Sparta na Rotterdam. Esaki a tuma lugar den presencia di Minister
Plenipotenciario Ady Thijsen, Director Tecnico di AVB David Abdul, e staff di AVB-NL,
varios invitado renombra den futbol na Hulanda, y algun Arubiano cu ta residencia na
Hulanda. Entre e personalidadnan importante tawata tin miembronan di directiva di
Sparta Rotterdam, hoofdjeugdopleider di Sv Excelsior, y e staff tecnico di Spartaan’20.
E proyecto aki tin varios aña den formacion, cuminsando como un soño y awe ta bira
un realidad pa AVB.
Un aña pasa, AVB a bira un di solamente 25 paisnan mundial escogi pa e proyecto
TDS (Talent Development Scheme) y un FIFA Coach. AVB a presenta na FIFA un di e
plannan tecnico estrategico mas fuerte den nos region, segun evaluacion di ambos
Concacaf y FIFA. Esaki a duna Aruba un oportunidad unico pa habri un departamento
dedica na Hulanda, cu meta pa scout, desaroya, y prepara talentonan cu raiz Arubiano
cu ta biba na exterior. Tambe e departamento ta duna respaldo na e hobenan cu ta bay
biba Hulanda pa estudio. E meta final? Pa prepara talento Arubano pa hunga pa nos
isla, y haci Aruba mas competitivo den e region di CONCACAF. Ta bon pa menciona cu
e departamento aki ta wordo completamenta sosteni financieramente door di FIFA cu
tin fondonan special pa projectonan asina. Asina FIFA ta hasi posibel pa desaroyo tanto
na Aruba como na Hulanda por sigi hunto, dunando mas oportunidad pa nos futbol
crese.
E AVB-NL Department ta enfoca riba Elite Player Development pa traha cu talentonan
hubenil na Hulanda. Bou direccion di Geeta Khemlani, Head di Elite Player
Development, e team tecnico ta consisti di Ixora Balootje (coordinador di damas),
Reinhard Breinburg y Ronnie Nouwen (coordinadornan pa teamnan O17, O20, y Jong
Aruba), y Marlon Dandare (head di scouting). E coordinadornan ta traha cu coaches y
scouts cu tin hopi experiencia y ta evaluando y preparando e hubentudnan talentoso pa
representacion na torneonan importante manera e Concacaf U17 Men y Concacaf
Womens O20 Championship na februari 2025. E projecto aki ta trece e lazonan entre e
futbol di Aruba y esun na Hulanda mas serca di otro, manteniendo e contactonan mas
estrecho y tambe pa hungador cu sali for di Aruba, por wordo atendi debidamente na na
yegada. E meta siguiente ta forma e seleccion nacional pa futuro, y yuda nos isla bira
un competidor den e region y asina logra realisa e vision di AVB pa bira un isla
importante pa futbol den caribe.
