Kick off meeting pa digitalisa sector di cuido a tuma luga

Kick off meeting entre Ministerio di Turismo y Salud Publico, Setar NV y AZV. Esaki a tuma lugar na bestuurskantor apenas 6 dia despues cu a firma e acuerdo di intencion. Minister Dangui Oduber mes a dirigi e prome reunion caminda ta bay traha hunto pa digitalisa henter e sector di cuido na Aruba. Tur esaki ta conforme e maneho di Minister Oduber cu ta basa na mehora e calidad y servicio den cuido medico.

Ministerio di Turismo y Salud Publico semper a kere den innovacion haciendo uzo di tecnologia pa

mehora diferente servicionan. Durante pandemia a introduci e Aruba Health App cu a maneha henter e programa di vacunacion. Mas di 80 mil persona registra na Aruba a haci uzo di e aplicacion aki. E plataforma di Aruba Health App a keda reconoci mundialmente pa e innovacion aki. Tambe Aruba a gana hopi premionan internacionalmente pa e vision innovativo cu Aruba tabata tin pa lansa un App pa maneha testnan di local y turistanan durante e pandemia. Despues a lansa e proyecto di Aruba Happy One Pass cu tambe resulta hopi exitoso. Conhuntamente cu SVb a lansa e App di Mi Svb y den pasado a Lansa tambe e App di AZV. Aki por mira cu semper innovacion tabata central den e maneho di Minister Oduber. Kick Off Meeting

E prome reunion pa digitalisa henter e sector di cuido ta uno hopi importante. Den e reunion aki a determina e contenido di e acuerdo cu lo mester wordo firma oficialmente prome cu 1 di november

2023. A pone lineanan recto di e structura di con ta bay traha cu otro. A mustra riba cua ta e prioridadnan pa Ministerio di Tursimo y Salud Publico y tambe e “timeline” cu lo bay traha cune. E punto di salida di Ministerio ta cu lo kier mira resultadonan concreto por medio di e acuerdo cu lo wordo firma.

Kier mira un mehoracion di e calidad di servicio cu ta wordo duna na e aseguradonan. Kier mira mihor accesibilidad pa e aseguradonan cu nan dokter di cas y specialistanan, kier mira mas eficiencia y transparecia. E plataforma cu a scohe pa haci esaki ta e Aruba Health App.

E meta ta pa sigui desaroya e “Aruba Health App” pa facilita servicionan den cuido medico. Lo bay desaroya e applicacion pa den un manera mas eficiente, e asegurado por traha su afspraak via e app aki sea ta na un dokter di cas of un specialista. 

Tambe lo bay desaroya e app di un manera cu lo bay trata di incorpora un manera pa e asegurado por ricibi y maneha su resultado di test nan den e applicacion mes. Un otro desaroyo importante di e applicacion lo ta pa duna e posibilidad pa e asegurado por ricibi su recetanan prescribi den manera digital huntu cu un film cu ta demostra con pa usa e remedi nan prescribi. Por ultimo via e aplicacion e asegurado lo por haya estadisticanan di su consumo di remedi y di su bishitanan na dokter y specialista. Tur esaki ta den cuadro di transparencia pa e asegurado y tambe pa AZV tin un mihor bista. E proyecto innovativo aki lo bay cambia henter e sector di cuido na beneficio di e asegurado. Miniter Oduber ta hopi contento di e “partnership” cu tin entre Setar NV y AZV. Hunto ta bay logra cosnan grandi pa Aruba.