Resientemente nos a tuma nota di e preokupashon ku ta eksistí pa e preshon di trabou ku tin riba personal di CMC. E preokupashon aki a keda ekspresá pa medio di un karta di sindikato CBV pa Minister di Salubridat, Javier Silvania.
E preokupashon di CBV ta basa riba “uitstroming i ziekteverzuim”. Segun CMC e preshon di CBV aki ta kondusí nan un situashon di inseguridat bou di e trahadónan pa nan no kometé fayo. CMC na su turno ta di opinion ku e situashon aki ta un tendensia den sektor kompletu di kuido. CMC no ta ninga ku lo por tin un preshon èkstra riba trahadónan i ta nombra un seri di posibel faktornan pa esaki.
Un di e faktornan ta e skarsedat di medionan finansiero ku ta kousa skarsedat di medionan ku a fasilitá e trabou di kuido. Esaki ta trese strès bou di e personal pasobra nan tin preokupashon pa e disponibilidat di medio- i produktonan.
Banda di esaki e situashon finansiero ta stroba pa yena e vakaturanan ku ku tin den kuido. E puntonan importante aki, esta falta di personal i sòru pa e medionan nesesario pa e profeshonalnan den kuido por hasi nan trabou, ta keda atras pa motibu ku minister Silvania ainda no ta respetá veredikto di Korte i paga CMC e sobra di e 40 mion florin ku gobièrnu debe.
Ta bin aserka e efekto di redukshon di salario a base di e lei di LNT ku ainda no ta resolvé. Tampoko mester lubidá e akusashon públiko di parti minister Silvania riba un enfermera loke tambe ta yuda stimulá e sentido di inseguridat bou di e trahadónan.
Miéntras ku e situashon aki ta tumando lugá ta lamentabel ku, segun por komprondé no tin konsulta struktural ta tuma lugá entre CMC i CBV huntu ku mediadó loke tabata un proposishon di Parlamentario pa frakshon di MAN, Giselle Mc William pa yuda drecha e relashon entre partidonan. Di e manera aki ta trese tambe trankilidat den CMC i bou di e trahadónan. MAN-PIN ta tambe hasi un yamada na CBV pa sinta ku su partner na mesa ku ta CMC na bienestar di trahadónan i kuido, miéntras ta urgi minister Silvania paga loke GOBIÈRNU debe CMC.
