Minister di Finansa den reunion cu Secretario di Estado Van Huffelen riba RAFT:
Ta bon pa haya un opinion di un tercer riba e factibilidad di e normanan cu tin awo riba mesa
Hunto cu Minister President, Minister Maduro a reuni diasabra cu Secretario di Estado Van Huffelen riba locual mester bira e Ley di Reino pa supervision financiero RAFT. Pa e mandatario di Finansa ta importante pa Aruba por tin normanan adapta na e situacion post-pandemia, ya cu e situacion financiero despues di e pandemia ta uno hopi diferente cu esun di aña 2018 ora a cera Protocol cu Hulanda. Keda tene na normanan pre-pandemia lo duna resultado irealistico y ta haci daño na gobernacion y economia di Aruba. Pesey ta bon pa haya e opinion di un tercer riba e factibilidad di e normanan cu awo tin riba mesa.
Di LAFT pa RAFT
Desde aña 2015 Aruba conoce supervision financiero basa riba e Ley di LAFT. Den e relacion nobo cu Aruba tin cu Hulanda na unda cu Aruba ta haya fianza di Hulanda pa surpasa e pandemia, Hulanda a pone como condicion pa e supervision financiero existente wordo etala na nivel di Reino den forma di un Ley di Reino, Rijkswet Aruba Financieel Toezicht (RAFT). Di e manera aki Aruba lo conoce e mesun sistematica di supervision financiero manera esun di Corsou y Sint Maarten. Motibo pa e cambio di LAFT pa RAFT, ta e deseo pa Hulanda tin mas di bisa den e situacion di supervision, awor cu a haci fianza grandi na Aruba.
Norma financiero
E supervision financiero ta basa riba algun norma pa locual ta e nivel di deficit, debe y gasto di personal. Den e Ley di LAFT tabata tin norma financiero pa aña 2015 pa 2018. Ora esakinan a caduca, a acorda normanan nobo den e Protocol di aña 2018 cu mester conta di aña 2018 pa 2021. Na december 2021 a alarga e Protocol di 2018 cu dos aña mas te cu aña 2023. Debi na e hecho cu Hulanda ta presta Aruba placa, nan kier a mira e supervision den forma di un Ley di Reino y pa cu esaki ta negosha awor riba e normanan nobo pa e tempo nos dilanti. Te cu awor a logra pa negosha e norma pa gasto di personal y esun pa e debe, pero esun pa e deficit ainda Hulanda ta boga pa e norma ta un surplus pa aña 2023 bay dilanti. Teniendo na cuenta e efecto financiero di e pandemia y e hecho cu Aruba ta den pleno recuperacion, e norma pa un surplus di 1% equivalente na 60 miyon florin pa aña 2023 en adelante, ta uno hopi dificil pa por bay cumpli cun’e. Esaki lo significa den practica, por ehempel, un recorte den presupuesto di Pais Aruba di 287 miyon florin. Un suma cu lo
paralisa gobernacion y hunto cun’e lo tin efecto negativo pa economia di Aruba. Pa e motibo aki keda wanta na e norma pa deficit lo produci resultado irealistico.
Un tercer pa duna un opinion riba e norma
Pa por yega na un norma mas adecuado pa Aruba, ta pidi e opinion di un tercer persona. Hulanda kier pa CAFT duna su opinion riba e normanan. Di banda di Aruba ta pidi IMF pa indica si e norma cu tin te awor riba mesa lo ta uno factibel pa Aruba.
