Den 10 minuut bo por yega na un decision educa pa e sigiente 4 aña. Stichting Fuente ta presenta un herment-digital pa votado di Aruba, e proyecto Stemwijzer ta bek cu un sistema sofistica den guia di voto. Varios partner y compania local cu ta kere den e movimento imparcial democratico aki ta sostene Votaruba.org cu e fin pa e votado Rubiano por haci un voto bon informa y trece adelanto den nos manera di vota a base di emocion of vota di forma partidista.
E herment aki lo ta disponible entrante 9 di Juni riba website votaruba.org.
Kico ta Votaruba.org?
Siguiente eleccion na Aruba lo tuma lugar riba 25 di Juni, 2021. Den e contexto aki, un Stemwijzer electoral a wordo desaroya, esta votaruba.org. Esaki ta un sosten brinda na e votado na caminda pa eleccion. Votaruba.org ta un herment digital cual despues di contesta algun proposicion, ta mustra e usuario cual partido ta identifica mas cu ne basa ariba ideologia. Den e resultadonan, e usuario por orienta su mes mas extensivo riba e posicionan di tur partido y revisa tur otro informacion.
E Proyecto di Stemwijzer, votaruba.org, ta un colaboracion entre stichting Fuente y ProDemos. Fuente ta un colectivo di studiantenan Arubiano y hobenan profesional cu ta biba na Hulanda, pero ainda ta carga un amor grandi pa nan isla. ProDemos ta e desaroyador di e Stemwijzer na Hulanda y ta traha cu organisacionan rond di mundo. ProDemos ta un fundacion independiente, 100% confidencial y neutral, cu e meta pa informa hende y involucra nan den e proceso democratico, na unda privacidad di votador ta wordo salvaguardia. E relacion di cooperacion ta basa riba compromiso di miembronan di Fuente riba un base boluntario, hunto cu e infrastructura digital y expertisio di ProDemos.
Cuater aña atras e prome Stemwijzer pa Aruba a wordo desaroya. Na 2017, tur partido politico Arubano a provee informacion y ultimamente e Stemwijzer digital a wordo uza mas cu 11,000 biaha . Durante ultimo eleccionnan, nos a mira con hendenan pa prome biaha a cuminsa discuti nan diferencianan abiertamente den posicionnan entre partidonan politico. Pa Stichting Fuente y votaruba.org, esaki ta locual ta mas importante.
Nos ta invita tur persona cu derecho di voto na Aruba pa haci uzo di votaruba.org y conose cual ta e partido cu ta comparti e mesun opinion cubo ariba asuntonan di importancia pa nos pais. Ora cu completa e encuesta bo lo ricibi resultado di e 3 partidonan cu tin mas en comun cu bo punto di bista. E posicion mas halto riba e lista ta e partido cu tin mas similaridad den respuesta.
Votaruba.org ta solamente un parti di un decision conciente durante eleccion. Por fabor consulta e programanan politico, debate y otro fuente di informacion pa haña un bista completo di tur e posicionan di e partidonan politico
Bishita tambe nos FAQ-area pa ricibi mas respuesta na preguntanan cu nos ta ricibi frequentemente atraves di votaruba.org