Na luna di mei último Dutch Caribbean Nature Alliance (DCNA)‘s su stazjèr di investigashon Nina Zander a hasi un yamada via medionan sosial pa yena un kuestionario. E enkuesta akí tabata parti di su investigashon pa haña sa kon resiliente kas di famianan boneriano ta relashoná ku debilidatnan kousá pa kambio di klima. Un gradisimentu ta bai na tur persona ku a yena e lista di enkuesta. Miéntras tantu su investigashon a terminá. E resultadonan di e investigashon akí ta sugerí ku tin hopi barera ainda ku ta stroba ku kas di famianan boneriano ta alkansá resiliensia pa kambio di klima. Ta nesesario pa tuma akshon pa halsa e resiliensia akí.
Kambio di Klima i debilidatnan
Keintamentu di mundu ta kousa kambio den klima. E kambionan akí ta trese ku nan menasanan (debilidatnan) di klima. Por premirá ku esakinan ta bai presentá mas frekuentemente òf mas intensivamente den futuro. Ehèmpel di e menasanan akí na Boneiru ta tormenta tropikal, orkan, inundashon i sekura. Esakinan por destruí naturalesa di Boneiru, manera su koralnan i mondinan di palu di mangel. Tambe nan por kousa daño na siudadanonan di Boneiru. Por ehèmpel, nan por kousa leshon òf malesa i nan por destruí infrastruktura vital i edifisio. Tambe nan por kousa daño na e ekonomia i baha e entrada di kas di famianan. Islanan chikitu – manera Boneiru i e otro islanan di Karibe Hulandes – ta kore prinsipalmente riesgo. Tambe ta spera ku e islanan akí lo sinti mas efekto di e impaktonan di kambio di klima. Pa e motibu ei, ta importante ku e islanan akí i nan kas di famianan ta resiliente pa e menasanan di kambio di klima.
Investigashon i resultado
Esaki ta e motibu dikon Nina Zander, kende ta e stazjèr di investigashon di DCNA i studiante di Master di Siensia na Universidat di Utrecht, a investigá kon e resiliensia di e kas di famianan boneriano ta pa konfrontá debilidatnan kousá pa kambio di klima. E resultadonan di su investigashon ta sugerí ku ainda tin bastante barera promé ku e kas di famianan alkansá sufisiente kalidat di resiliensia. Por ehèmpel hopi kas di famia no ta sigurá kontra daño kousá pa e debilidatnan di kambio di klima akí. Ni tampoko nan no tin sufisiente sèn di spar pa por kubri daño similar. Ademas, kas di famianan no ta na altura kon kambio di klima por hasi impakto riba nan ni kon nan por prepará pa esaki. Pobresa tambe ta un otro barera. Ademas e resultadonan di e investigashon akí ta sugerí ku algun sorto di kas di famia, manera kas di famianan grandi i kas di famianan ku tin un grado abou di edukashon, promedio tin chèns di ta ménos resiliente.
Kiko awor?
Pues akshon pa halsa e resiliensia pa klima ta altamente nesesario. Institutonan manera gobièrnu por inisiá e tipo di akshonnan akí. Por ehèmpel, nan por krea un plan di akshon. Protekshon i rekuperashon di naturalesa di Boneiru lo mester ta parti di esaki. DCNA ta duna rekomendashonnan pa esaki den nan ‘Plan di Akshon pa Klima pa Karibe Hulandes’. Abo mes tambe por tuma medida, manera sea sigur ku bo pólisa di seguro ta kubri kambio di klima i tuma bon nota di foyetonan di Entidat Públiko Bonaire (OLB) tokante kombatimentu di desaster. Ademas sea sigur di ta bon na altura di e informashon tokante impakto di kambio di klima dor di aboná riba e boletin di notisia digital grátis Bionews i dor di tira bista riba DCNA su kanalnan di medionan sosial.
Bo ta interesá den mas informashon?
Bo ta interesá den mas informashon tokante e investigashon akí? Bo por haña Nina su tesina i e rapòrt pa komunikashon tokante esaki riba Dutch Caribbean Biodiversity Database. Pa pregunta por tuma kontakto ku Nina tambe via
nina.p.zander@gmail.com.