Totalmente asombrá, pero alabes desapuntá, mi a keda ora ku ayera durante e reunion di Konseho Insular no tabatin ningun diputado presente pa atendé ku e karta ku e seri di preguntanan ku mi a hasi enkuantu e disputa ku ya pa basta tempu ta eksistí entre ASOTEKO i Entidat Públiko di Boneiru i ku ta den korte aktualmente. Mil i piku habitante di e isla aki, pagadónan di belasting ni sikiera a haña e rèspèt di partí di gobernantenan pa atendé ku nan problemanan ku pa añanan ta sintá kuné i ku den tur sorto di forma nan a purba pa yega na un areglo amistoso pa evitá ku a hues tin ku duna un sentensia.
Fuera ku ningun di e tres diputadonan, esta Sres. Kroon, Thielman i Tjn-A-Tjoe no a presentá na e reunion, gezaghèber komo presidente di gobernashon di nos isla mester a informá públikamente ku ni trata no a trata e karta di mi persona den Kolegio Ehekutivo. Un falta di rèspèt total pues pa un representante di pueblo ku na nòmber di mil i piku habitante a hasi preguntanan ku e meta pa yega na un solushon.
E aktitut di diputadonan di UPB i MPB a demonstrá klaramente ku nan no ta duna ningun balor na e hende. Ta asina aki ta praktiká kurason pa hende, ta asina nos kier solushoná huntu nos problemanan di komunidat?
Ta e mesun personanan aki tin e kurashi pa bin pidi e mesun mil i piku habitantenan un voto di konfiansa pa dia 15 di mart awor.
Mi ta spera ku tur e miembronan di ASOTEKO ta konsiente awor kon e koalishon aktual ta balorá nan komo hende i kon e koalishon aktual ta balorá nan preokupashon di añanan. Boso no mester di konseho di voto, pero boso konsenshi mes lo guia boso pa kua partido sigur boso NO por duna boso konfiansa un biaha mas.