E reakshon di CFT (College Financieel Toezicht) riba e di 3 raportage di ehekushon di 2023, ta duna bista riba basta punto di preokupashon.
- CFT ta remarká ku entrada (loon i inkomstenbelasting) den kaha di gobièrnu ta keda atras. Según CFT, Gobièrnu mester duna bista dikon e entradanan ta keda atrás i ku gobièrnu mester sòru pa kumplimentu ku impuesto bira struktural.
- Otro preokupashon ta, ku aña pasá ta na último momento a atendé ku diferente gastu di gobièrnu, lokual a baha e ‘overschot’ riba presupuesto di forma supstansial.
- E gastunan di seguridat sosial (gastunan médiko, AOV èts) ta mas haltu ku den mes periodo 2022. Esaki ta nifiká ku 2024 nan ta subi ainda mas?
- Preokupante tambe ta pa CFT ku Kòrsou a invertí solamente 17 mion di 90 mion ku tabata tin pa invertí. Gobièrnu no ta duna niun splikashon!
- CFT ta mustra ku a pone 7 mion pa Campo den kuenta anual di aña 2022, anto den 2023 a pone 1 mion, CFT ta pidi splikashon riba esaki pasombra e suma no tabata presupuestá.
- CFT ta mustra ku te ainda gobièrnu no a atendé ku e fiansanan na CMC.
- Pa lokual ta e saldo di likídes, esaki a baha ku 23 mion den komparashon ku 2022. CFT ta suprayá ku e a bisa gobièrnu pa basta tempu kaba pa laga evaluá e posishon di likides i traha un planifikashon di mas aña.
- Pa ku sektor kolektivo CFT, ta mustra ku gobièrnu no a kumpli ku lei. Gobièrnu no a raportá riba e sifranan di sektor kolektivo den aña 2021 i 2022. Esaki ta hasi ku no por kalkulá e “rentelast norm” i no sa kuantu Kòrsou por fia sin drenta den un posishon insostenibel.
Pa MAN PIN, e puntonan aki ta di gran preokupashon. No solamente nan ta mustra fayonan grandi den e maneho finansiero pa e último dos aña, pero ta antesala di e tratamentu di e presupuesto di 2024. Den e presupuesto di 2024 ademas mester tene kuenta ku kon ta atendé ku e problemátika di ENNIA, e fiansanan di Covid i CMC. Tur esaki ta trese un interogatorio grandi kon realista e Nota di Kambio riba presupuesto di 2024 lo ta.