Tourism Corporation Bonaire ta informá
E sifranan preliminar ta indiká ku na luna di òktober 2023 Boneiru a yama bon biní na 13.525 bishitante stayover. Kontá for di yanüari te ku òktober Boneiru a yama bon biní na un total di 139.490 bishitante stayover, loke ta surpasá e sifranan di e mesun periodo na aña 2019 (130.300) i na aña 2022 (137.500).
Na luna di òktober Regatta di Boneiru a hunga un ròl importante i a hala hopi bishitante, prinsipalmente for di nos islanan ruman. Kompará ku aña pasá, esta
2022, Boneiru a risibí 1844 bishitante for di Kòrsou i 281 bishitante for di Aruba, miéntras ku e aña akí, 2023, Boneiru a yama bon biní na 2702 bishitante for di Kòrsou i 380 bishitante for di Aruba, loke ta un indikashon di un interes kresiente pa Regatta di Boneiru i su ròl influyente pa loke ta trata atrakshon di bishitante for di nos islanan bisiña.
Na luna di òktober 2019 Boneiru a yama bon biní na 12.200 bishitante. Luna di òktober 2023 pues ta mustra un oumento remarkabel. Sinembargo ta bon pa menshoná ku na luna di òktober 2022, Boneiru a yama bon biní na 14.310 bishitante stayover. E klimaks akí den luna di òktober 2022 a keda direktamente influensiá pa e kapasidat èkstra di buelo di American Airlines (ku tres buelo pa siman) i e avionnan
Boeing 777 di KLM. TCB a logra introdusí e kapasidat èkstra di stul akí den luna di novèmber 2023 atrobe, pa kompensá e redukshon resien di disponibilidat di stul den luna di sèptèmber i òktober.
Hulanda i Merka ta Boneiru su dos merkadonan di orígen di mas grandi pa bishitante i nan tur dos ta stabil. Na luna di sèptèmber 2023, 2260 for di Merka a forma 16,72% di e kantidat total di bishitante stayover, miéntras ku 6384 bishitante for di Hulanda a forma 47,24% di e kantidat total. Remarkabel ta ku bishitantenan for di Kòrsou a hunga un ròl krusial den turismo na Boneiru, ku un aporte di 2702 bishitante, o sea 19,98%, miéntras ku Aruba a kontribuí ku 380 bishitante loke ta representá 2,81% di
e kantidat total.
Banda di nos merkadonan primario di orígen, e éksito turístiko di Boneiru ta haña sosten mas aleu atraves di bishitantenan for di Alemania, Bélgika, Brasil, Canada, Reino Uní, Colombia i Suisa. Na luna di òktober 2023 Alemania a bini dilanti komo un merkado fuerte, ku 334 bishitante stayover, ku kua e pais akí a sigurá su mes di un lugá riba e lista di merkadonan ku ta presta mas mihó pa luna di òktober. Pa loke ta trata demografia di e bishitantenan, e grupo di edat mas komun ta di 45 pa 54 aña.
Si nos tira un bista mas djaserka riba e merkado merikano, ta resultá ku e estadonan Florida, California, Texas, New York, Colorado, Pennsylvania, North Carolina, Virginia, Georgia i New Jersey tabata e fuentenan mas importante di bishitante. Pa loke ta trata bishitantenan hulandes e provinsianan mas importante di prosedensia tabata Zuid-Holland, Noord-Holland i Noord-Brabant. Banda di esaki na luna di september Boneiru a yama bon biní na 14.447 bishitante krusero.
Pa estadístika i informashon mas detayá tokante Boneiru su prestashonnan turístiko
bo por bishitá nos wèpsait ofisial riba www.bonaireisland.com òf bo por tuma kontakto ku nos via email riba info@bonaireisland.com.
