Clifton ta kolaborá ku e talentoso kompositor i kantante Stanley Clementina, pa produsí un R&B na papiamentu, algu ku no a keda hasi anteriormente.
Ku ‘Un anochi na NICE,’ Clifton i Stanley a hinka músika R&B na papiamentu den un bachi nobo, pero tòg ku un toke di R&B tradishonal, inspirá pa artistanan manera R Kelly i Jodeci, kende a perfekshoná R&B sensual popularisá na aña ’90. Stanley Clementina a areglá i komponé e piesa, pero Stanley, Clifton End i Vincent da Silva a skibí e letranan. Segun Clifton, ‘Un anochi na NICE,’ ta deskribí un anochi sensual entre un pareha na Nice, Fransia, unda pashon ta para sentral.
Clifton su gira europeo i plannan grandi pa futuro
Clifton tin varios piesa kompletá ku lo keda publiká e aña aki, ku ta varia di Ritmo Kombiná na papiamentu, pa piesanan di R&B. Na òktober 2023, Clifton a haña un oportunidat úniko pa bai riba un gira europeo ku e banda The Chicago Funk ku nan ‘Earth, Wind and Fire Experience’. E gira ta asina eksitoso ku ya nan a anunsiá nan gira teatral ku ta planiá pa sèptèmber 2024.
Aktualmente Clifton ta trahando riba dos álbum pareu. Un di R&B i Soul i e EP tan spera, tentativamente titulá ‘Mi Pais,’ ku ta planiá pa sali na 2024. Pronto Clifton lo lansa e kolaborashon ku Buleria, kual ta e ‘remake’ di ‘It’s All About You,’ ku kantante Buddy Love. Anteriormente, Buleria a invitá Clifton riba ‘Wat Is Je Naam’, i awó e talentoso banda rubiano ta debolbé e fabor.
Stanley Clementina ta bai pone 2024 na kandela
Stanley Clementina tin plannan grandi pa 2024 i tin varios proyekto alentador na kaminda. Pronto Stanley lo saka un kantika rapper DONGO i e talentoso Jandino Asporaat. Despues di esei, e siguiente álbum di C-Shaw ta bai sali, e banda di Kompa funda pa Stanley. Tambe Stanley a kontinuá su kolaborashon musikal ku kantante Jayh Jawson, unda ya pa algun aña e ta funkshona komo su direktor musikal. Aktualmente Stanley ta preparando pa Jay Jawson su presentashon na AFAS, akompaña pa Steez Music Band, otro banda funda i guia pa Stanley. Stanley i Jayh Jawson, ya a kolaborá riba varios hitnan memorabel manera ‘Wowo Sera,’ ‘Amor Sekreto’ i ‘Mijn Only.’
Djasabra ultimo, Stanley i amigunan a presentá na Feel Good Festival, riba tarima di Islemunda na Hulanda.
Korda chèk ‘Un anochi na NICE’ i riba plataformanan digital i pidi e piesa na bo radio emisora lokal preferi.
Pa sigui Stanley Clementina su proyektonan musikal, akudí na Facebook.com/stanley.clementina i Instagram @stanleyclementina. Pa mas informashon di Clifton End su diferente proyektonan, chèk su página sosial di Facebook @cliftonendmusic i Instagram @cliftonend. Tambe por mail info@buzzbinproductions.com pa presentashon i demas informashon.
