Ta pèrmití atrobe pa kampa durante Semana Santa i Pasku Resurekshon. Dos aña largu esaki tabata prohibí debí na e pandemia di Covid. Ta pèrmití pa kampa for di 13 te ku 20 di aprel 2022. Esunnan ku tin plan pa bai kampa mester tene nan mes na algun regla spesífiko sí.
Na promé lugá e personanan ku ta bai kampa mester registrá na Selibon. Einan bo ta notifiká na unda bo ta bai kampa i ku kuantu persona. Komo servisio pa e kampadónan ku a registrá, Selibon lo pasa tur dia pa kolektá shushi. Un lista di e kampadónan registrá ta nesesario tambe pa siguridat. Si algu pasa, e ora ei e servisionan di emergensia sa rápidamente kuantu hende tin presente na bich i ken ta pertenesé na kua grupo.
E kampadónan mester tene nan mes na e siguiente reglanan:
- Ta pèrmití solamente pa kampa for di 13 di aprel te ku 20 di aprel 2022.
- Registrá adelantá na Selibon.
- No tira shushi abou, tira tur shushi den kliko.
- Hasi uso di e klikonan ku ta disponibel.
- Hasi uso di un konfó òf grel. No sende karbon den santu.
- Tira sobrá di karbon den e klikonan ku ta destiná pa esei.
- Ta prohibí pa kap òf kòrta mata den e área kaminda bo ta kampa.
- Ta prohibí pa bai ku kachó riba bich.
- Ta prohibí pa subi ku outo riba bich.
- Ta prohibí pa landa piska (piska ku dùikbrel).
- Ta prohibí pa piska gutu i kue kref i karkó.
- Ta prohibí pa konstruí algu riba un konstrukshon eksistente.
- Tur hende ku ta usa sierto material òf opheto pa konstruí nan sitio di kampa, ta responsabel pa no laga nada atras ora ku nan ta rùim òp e sitio di kampa atrobe (por ehèmpel palèt).
- Tene kuenta ku otronan ku tambe ke hasi uso di bich, manera turista. Duna nan espasio pa nan tambe gosa di e área.
- No ta pèrmití pa toka músika entre 3 or di mardugá i 6 or di mainta.
- Na Sorobon no ta pèrmití pa toka músika pa evitá molèster pa bestia. Esaki ta un área RAMSAR.
- No ta pèrmití pa kampa na Klein Bonaire.
Ta konsehá personanan ku ta bai kampa pa bai ku medidanan di prekoushon pa nan propio siguridat. Bai ku un kaha di EHBO i un aparato pa paga kandela.
Selibon a pone kliko na bich. Esakinan tin diferente koló pa kolektá shushi na un manera separá. Kampadónan tambe tin ku separá nan shushi i tira esaki den e klikonan korekto.
Dos aña largu kampamentu no tabata posibel debí na e pandemia di Covid. Covid no a bai ainda. Te ainda hopi hende ta pega ku e vírùs. Pa evitá pegamentu ku e vírùs ta pidi tur hende pa durante kampamentu tambe tene kuenta ku e reglanan básiko di Covid (entre otro tene distansia i laba man regularmente). Esaki pasobra kampamentu mester ta un momentu di alegria pa tur hende.
