Frakshon di MAN a entrega inisiativa di kambio di lei di penshun di empleado públiko unda ta eliminá e diskriminashon riba indeksashon pa loke ta e penshun di èks empleado públiko. E kambio ta enserá ku ta kita e kondishon di indeksá penshun di e penshonado si Gobièrnu indeksá salario di su empleadonan. Ku e kambio aki e úniko kondishon pa indeksá penshun di penshonado ta si e fondo di penshun tin un solides “dekkingsgraad” di 105% of mas.
Ku esaki Frakshon di MAN pero tambe MAN-PIN ta duna aporte na alsa kalidat di bida di e penshonado pero tambe eleminá deskriminashon ku no ta kontribuí den adelanto i bienstar di e hende. E kambio di lei aki ta bini despues ku Frakshon di MAN a reuní ku grupo di penshonado preokupa.
Nos kier gradisi e grupo di penshonado di APC kual a duna un man i tambe risibí nos Frakshon pa asina nos por skucha i deliberá riba e tema aki.
Penshun – AOV
Banda di esaki pa salbaguardia bienestar i dignidat humano di nos grandinan MAN-PIN ta konvensi ku mester laga indekasashon penshun di behes (AOV) i suèldo mínimo na oumento di kosto di bida i no kresementu ekonomiko manera tin pone pa AOV. A bira tempu pa mara e oumentonan aki den lei na oumento di kosto di bida.
Nos ta di opinion, si a base di e sifra di inflashon ta meresé ku ta indeksá salarionan, mester indeksá alabes e penshun di behes i suèldo mínimo. No ta aseptabel mas ku ta laga penshonadonan i trahadónan na klemensia di e minister pa disidí si ta oumentá penshun di behes òf suèldo mínimo.
MAN-PIN ta mustra ku konsekuensia di e maneho aki ta ku e buraku entre entrada na penshun òf suèldo mínimo i e nivel mínimo di eksistensia a krese enormemente. Kòrsou segun último sifranan a bira e pais mas pober den Reino. Penshonadonan ku ta kobra solamente un penshun di behes ta biba den pobresa.
Minister di Desaroyo Sosial, Labor i Bienestar, Ruthmilda Larmonie-Cecilia a indiká den Parlamento ku 60% di e poblashon tin un entrada bou di e nivel mínimo di eksistensia miéntras ku 42% di e poblashon ku ta traha ta gana suèldo mínimo òf ménos. MAN-PIN ta para fuerte pa trese kambio den lei di aov i e lei di suèldu mínimo na fabor di penshonadonan i trahadónan.
MAN-PIN ta asta dispuesto pa wak kon di un forma òf otro envolví kobradónan di ònderstant den e kambionan aki. E nivel di ònderstant bou di kondishon tambe mester ta mará na e sifra di inflashon. Un di e kondishonnan ku segun MAN-PIN por pensa riba dje ta eksigensia ku e kobradó di ònderstant ta keda alsa su nivel di preparashon pa amplia su chènsnan riba merkado laboral i ku e ta obligá na solisitá i buska un trabou.