Kailen Wouters ta hasi su debut cu J&R Bycicles na Derby City

Depues di solamente tres siman cu e hoben Kailen Wouters a gana su di dos puesto di mundo na e UCI Cycling World Championships, na Glasgow Scotland, Wouters, un talento hoben pero no desconoci den e mundo di BMX a sali rumbo pa Louisville Kentucky, Merca, pa participa na e Nacionals Derby City. E aña aki, ta e 40 aniversario di e Nacionals Derby City, y segun e organizacion ta bisa “nan ta celebrando 40 aña di e bueltanan mas liher di e pais”, contando cu participacion di atletanan di entre otro Aruba, Florida, California, Michigan, Canada, y mas. Un alrededor di 700 cyclista a prepara pa e careda aniversario aki.

Pa Wouters e pista di Derby City ta un pista cu ya caba e tin experiencia riba dje, por cierto e ta su pista favorito na Merca. Kailen ta hasi su debut cu su equipo nobo, J&R Bycicles, na Derby City 2023. Un equipo di Merca cu recientemente na July a inclui Wouters riba su equipo nacional. Wouters ta sumamente orguyoso di bisti su uniform y representa su equipo nobo. Durante e fin di siman ultimo, 1-3 di september, e hoben Wouters a hasi un tremendo papel un biaha mas na Derby City. E la core den e categorianan di Open Class 9-10 y Expert 9 Class.

Resultadonan
Diabierna 1 di september e la logra gara dos segundo puesto, diasabra 2 di september e la gana di 3 y di 4 lugar, y diadomingo 3 di september Wouters a logra clasifica pa e main event, pues e final, pero a cai durante e final. Segun Wouters su mayornan, e hobencito mes a splica cu esaki ta parti di dje. Por cai, ta siña di dje y sigui pusha mas duro.

Pa e resto di e aña aki, Wouters tin algun careda mas riba e agenda. Cuminsando cu e careda Latino Americano dianan  9 y 10 di September, aki na Aruba mes. Na oktober, Wouters lo competi na Rock Hill BMX Supercross Track. Na november e hoben lo biaha pa Oaklahoma pa e careda di Grands y december e lo ta bek na Colombia pa e careda Las Luces.