Lokual ku tabata spekulashon pa un periodo largu ta e echo ku si Julius Koko ta bai drenta polítika. Nos a disidí ku nos ta bai den e kontienda elektoral ku Partido Bienestar Kòrsou. Bo lesa e nòmber so e ta bisa bo tur kos. Atraves di 66 aña un gran parti dje pueblo aki no a konosé bienestar manera mester ta, debí ku un grupito so a sabi na saka probecho dje isla aki. Ekonomia i Enseñansa a keda masakrá, kua a kondusí na ola grandi di kriminalidat ku a sabi na asotá Kòrsou. Tin vishonnan konkreto pone riba mesa pa nos saka Kòrsou pa dilanti. Nos a bisa semper ku si Singapur por a logra ku Kòrsou tambe por, pero nos mester di mandatarionan ku ta kla pa traha pa e pais aki.
Meta di Partido Bienestar Kòrsou ta pa pone e pais aki riba e kaminda ku nos hendenan ku ta biba den eksterior lo por regresá nan pais bek un dia di bon ku tur kos ta kanando. Kòrsou tin tur e potensial pa ta un pais próspero. Den e próksimo simannan pueblo di Kòrsou lo sabi kiko ta e plannan konkreto. De paso Partido Bienestar Kòrsou lo bai profilá ku un lista hopi balansa. Lo e presentá kandidatonan kla pa saka Kòrsou pa dilanti. Den e próksimo simannan Kòrsou lo sabi kua ta e kandidatonan ku lo ta riba lista. Nos tur tin un meta i esei ta saka Kòrsou pa dilanti.
Si bo ta klap‘e kambio sabi ku nos ta bai ofresé alternativanan ku di bèrdat ta for di un perspektiva kompletamente diferente. Nos meta tabata pa sali ku un grandioso parada 3 di yanüari, pero e medidanan ku diripiente a subi mesa di parti Gobièrnu di Kòrsou i partisipá pa OM a hasi esaki no ta posibel mas. Esaki no ta kita e loke ku nos ta di fokus p’e, paso dia 30 i 31 di yanüari tin ku risibí 788 firma pa asina nos por ta den kontienda elektoral 19 di mart 2021.
Si bo kier kambio di bèrdat bo sa kaba kiko tin di sosodé 30 i 31 di yanüari i despues 19 di mart. E desishon ei ta den bo man. Ku tempu tur hende por a tuma nota ku boso sirbidor no ta kla pa bek 1 mm. Komo polítiko tampoko. Si nos primintí kambio, ta paso nos sa ku por mas mihó pa e gran parti dje pueblo aki ku pa 66 aña a keda drai den un sirkulo visioso. Nos a mustra bo kaba kon ta sali pa e pueblo sin importá e Goliatnan ku nos mester a enfrentá. Ta keda na abo si bo kier pa nos kaba di hasi e trabou. Bo sa kaba kiko bo tin na nos. Nos meta ta un mihó Kòrsou pa nos tur i no un grupito so. Den e proksimo dianan nos lo presenta e plannan i kon nos por logra saka Kòrsou pa dilanti den e tempunan difísil ku nos ta konfrotando. Nos por i nos ta bai triunfa komo pais.
Solo el Pueblo Salva Al pueblo.
