Pais Kòrsou ta pasando su momentunan di mas difísil i próksimo gobernashon tin retonan grandi. E retonan aki ta trese kuné ku sierto ehersisionan mester keda hasi pa reskatá Kòrsou. Ta asina ku e debe nashonal di Kòrsou ta 3.8 bion florin n’e momentunan aki. Di esaki 3.1 bion ta debe na Hulanda. Dje 3.1 mion ku ta debe na Hulanda no ménos ku 2.4 bion tabata eksistí kaba promé ku covid 19. Dje 700 mion ku nos a risibí te ku awor aki di Hulanda no a haña ofisial ainda ku esaki ta sin kobro di interes. Kaha di gobièrnu atraves di entradanan di derecho di importashon, akseins i impuestonan direkto ta produsí 1.5 bion pa aña. E lokual ku Gobièrnu di Kòrsou tin ku saka pa aña ta 1.6 bion florin. Esaki ta nifiká un défisit di 100 mion ku téknikamente no mester eksistí. Ta asina ku den e 1.6 bion ei tin konforme datonan di Kontrolaria General un suma di kasi 200 mion florin ku ta ser paga na meerwerk den kuadro di trabounan hasi abase di destaho públiko ku no por ser hustifiká. Sektor di turismo ta representá 31% di nos produkto brutu nashonal. Pa final di 2019 nos produkto brutu nashonal tabata 5,5 bion florin. Tumando na kuenta ku debí na covid 19 pais Kòrsou lo keda afektá pa su ingreso pa lokual ta trata e sektor di turismo. Pa loke ta bunkering esaki ta representá 17% i Refineria Isla tabata 7%. Huntu e 3 sektornan ei ta representá te ku final di 2019 no ménos ku 55% di nos produkto brutu nashonal. Pa lokual ta trata sektor di turismo esaki lo keda afektá e próksimo 2 añanan debí na covid, kua lo por trese kuné ku nos lo por tin ku fia komo 1.2 bion florin den 2020 i otro 1.2 bion den 2021. Esaki lo trese kuné ku nos debe nashonal lo ta 6.2 bion florin pa final di 2022 kua ta nifiká ku esaki lo ta mas haltu ku nos produkto brutu nashonal. Si tin ku paga na interes i aflossing 5% dje debe nashonal, esaki ta enserá un pago mensual di 35 mion. Pa aña esaki ta 420 mion ku ta loke ku n’e momentunan aki gobièrnu ta kobrando na loonbelasting. Premirando e situashon aki ta fásil pa Hulanda sigui fia nos plaka na 2020 i 2021 tambe, pa asina haña nos den un situashon ku nos komo pais lo tin problema ku nos fondo di likides. Esaki lo krea e senario pa mas metementu di Hulanda den asuntunan interno di Kòrsou pa medio di entre otro CFT i otro órganonan. Promé ku yega dje leu ei nos mester dal sierto stapnan, paso atraves kua ta enserá sali mas for di e sistema di impuesto direkto pa esun indirekto. Loonbelasting ta produsí 431 mion florin pa aña i ganashi di impuesto ta mas òf ménos 150 mion florin. Eliminando loonbelasting i winst belasting ta trese kuné 580 mion florin pa sirkulá bek den nos ekonomia. Pa por gana e 580 mion florin aki bek den kaha di gobièrnu lo trese sierto modifikashon pa lokual ta trata tarifanan di derecho di importashon, akseins i tarifa di sierto servisionan estatal. Lo no subi OB riba makutu básiko pa asina hustamente protehé esnan ku tin entrada abou òf nada mes. Lokual ku si lo hasi ta oumentá porsentahe di OB riba produktonan di luho, tambe akseins i derecho di importashon. Eliminando e kasi 200 mion florin na meerwerk no hustifiká, lo krea espasio ku e lokual ku keda ahora lo ser usa pa programanan di supsidio pa stimulá eksportashon. Klave pa lokual ta trata futuro di Kòrsou ta konsentrá riba arkanan ku mester produsí i eksportá pa asina oumentá nos reserva di divisa. Ta masha importante pa sobrebibensia pa ekonomia di Kòrsou pa stimulá eksportashon, paso esaki lo generá mas kupo di trabou kua lo perkurá pa hasi nos aktividatnan ekonómiko mas sólido. Hasiendo e ehersisionan aki nos lo por bisa Hulanda ku nos no mester mas di nan inyekshon finansiero. Lokual ku si nan lo por yuda nos kuné ta ku asistensia tékniko pa kombatí e netwerknan di korupshon ku ta sakeando pais Kòrsou pa medio dje diferente strukturanan ku tin aktualmente.
