Mirando cu Joost Meijs lo bandona su funcion como CEO di Aruba Airport
Authority N.V. durante zomer di aña 2024, e seis aeropuertonan di Caribe Hulandes a apunta Jonny
Andersen, CEO di Curacao Airport Partners N.V., como e siguiente presidente di Dutch Caribbean
Cooperation of Airports (DCCA). A tuma e desicion aki basa riba unanimidad durante e reunion
colectivo di DCCA cu a tuma luga dia 11 di maart 2024. Joost Meijs tabata presidente desde e inicio
di DCCA na aña 2021.
Desde su inicio, e seis aeropuertonan di Caribe Hulandes ta cooperando mas intensamente mediante
intercambio di conocemento, realisacion di inspeccion di siguridad y colaboracion estrecho cu demas
stakeholder p’asina mehora e conexion (accesibel, eficiente y sostenibel) entre e islanan di Caribe
Hulandes. DCCA ta fungi como un punto di contacto central den Caribe Hulandes p’e stakeholdernan
importante den e industria di aviacion. DCCA su intencion ta pa mehora e conexion entre e islanan y
ta considera cu Caribe Hulandes ta posiciona perfectamente pa bira un lider mundial den tur e
maneranan sostenibel di biaha.
Cada aña DCCA, cu sosten di e aeropuerto anfitrion, ta organisa e conferencia “A Flight to the
Future”; na aña 2022 a organisa e conferencia aki pa prome biaha na Aruba. Durante e prome
edicion, e prome avion electrico a lanta vuelo rumbo p’e espacio aereo di Caribe. Na aña 2023,
Aeropuerto di Corsou, a sigui cu ne y a organisa e di dos edicion di e conferencia cu un demostracion
impresionante di drone. Riba 18 y 19 di november di e aña aki lo por conta cu e di tres edicion cu lo
tuma luga na St. Maarten. Durante e conferencianan aki, henter e ecosistema di aviacion den Caribe
Hulandes ta reuni pa combersa riba ambicion, tema actual y tendencia nobo como tambe innovacion
den e industria di aviacion (regional).
Joost Meijs, presidente saliente, a comenta cu: “Mi kier gradici mi coleganan, e directornan ehecutivo
di e seis islanan y demas stakeholder pa e colaboracion durante e ultimo añanan. Ta fantastico pa
mira y entretene tur e ambicionnan cu e aeropuertonan tin, y mi ta sigur cu mediante un colaboracion
habri nos lo por hiba e sector di aeropuerto den Caribe Hulandes na halturanan nobo. Jonny
Andersen ta un profesional den aviacion internacional y mi tin tur e
confiansa di mundo cu e lo lidera DCCA cu entusiasmo, energia y cu e nivel di mas halto di
profesionalismo”.
Jonny Andersen, e presidente nobo, a expresa su mas sincero gradicimento na Joost Meijs pa su
liderazgo yena cu vision y destaca pa Dutch Caribbean Cooperation of Airports (DCCA). Bou
liderazgo di Joost Meijs, DCCA a converti den un bos pa e aeropuertonan Hulandes den Caribe,
representando e interes comun di e seis aeropuertonan n’e gobiernonan, comunidad insular, e
aerolineanan asocia y demas stakeholder.
”Na nomber di e seis aeropuertonan Hulandes den Caribe, mi kier gradici Joost pa uni nos y pa su
liderazgo visionario”, asina Andersen a expresa. “Ta realmente un honor pa asumi e rol como
presidente di DCCA y mi ta comprometi pa continua cu e trabou cu Joost y e seis aeropuertonan di
DCCA a inicia. Hunto, nos lo desaroya e sector di aviacion di Caribe Hulandes ainda mas,
mehorando su siguridad, conexion, facilidad pa biaha, sostenibilidad y relevancia den e region.”
“Conexion aereo, accesibilidad y facilidad pa biaha entre e islanan di Caribe Hulandes lo ta den mi
prioridadnan principal durante mi mandato como presidente di DCCA. Actualmente, hopi persona ta
hay’e demasiado caro y ta rekeri hopi tempo pa biaha entre e islanan y tin biaha e ta tuma mita dia pa
biaha entre e islanan ruman. Esaki ta un preocupacion importante. Nos mester logra p’e biahenan
aereo bolbe bira un opcion factibel pa nos comunidad. Como sector, nos mester haci lo necesario p’e
biahenan entre e islanan ta mas factibel, accesibel y conveniente na beneficio di tur esnan den
Caribe Hulandes. Como presidente di DCCA, mi meta ta pa haci esaki un realidad”.
