Jeaninne Wong-Loi-Sing konsehero di integridat serka Rijksdienst Caribisch
Nederland, awe a risibí e Premio di Integridat Ien Dales 2024. Kada dos aña ta otorgá e
premio prestigioso aki na Hulanda na personanan ku ta hasi un esfuerso eksepshonal
pa promové integridat den e sektor públiko. E premio ta karga nòmber di èks minister
di Asuntunan Interno Ien Dales, un defensor di bon gobernashon públiko i integridat.
Jeaninne Wong-Loi-Sing ta risibí e premio pa motibu di su esfuerso pa promové
komportashon íntegro den Rijksdienst Caribisch Nederland. Su entusiasmo, profeshonalismo,
i e ehèmpel ku e ta pa otronan a impreshoná e hurado. Su esfuerso no solamente a promové
un kultura di integridat den Rijksdienst, sino tambe den e komunidat mas amplio di Hulanda
Karibense.
Modelo pa sigui na Hulanda Karibense
E entrega a tuma lugá durante un enkuentro di e Kátedra Ien Dales, organisá pa e fundashon
Stichting CAOP i Universidat di Leiden. Presidente di hurado Edith Snoeij: " Jeaninne a
demostrá ku integridat no ta un meta di un solo biaha, sino algu ku bo ta traha riba dje kada
dia. Su kapasidat pa logra resultado konkreto den un ambiente atministrativo kompleho, ta
pone ku den e dékada ku ta tras di lomba el a krese bira un modelo pa sigui na Hulanda
Karibense.”
Integridat i kolaborashon
E hurado tambe a elogiá Jeaninne pa su kolaborashon ku sindikato, mandatario, i kolaboradó
den desaroyo di maneho di integridat. El a start un kampaña pa plama e maneho aki bou di
kolaboradónan, i a lanta entrenamentunan tantu pa supervisor komo kolaboradó. Ademas,
Jeaninne Jeaninne Wong-Loi-Sing a lanta un ofisina pa apoyo di integridat den e
organisashon, di moda ku e tópiko aki a haña un kara rekonosibel. Tambe, el a introdusí un
prosedura di keho i un sistema di persona di konfiansa, i el a organisá investigashonnan di
satisfakshon bou di kolaboradó. Tabata diskutí resultadonan di esaki ku direktiva pa introdusí
mehorashon.
Tokante e Premio
Ta otorgá e Premio di Integridat Ien Dales na personanan ku durante nan karera òf na
momentu di ehersé nan funshon ta demostrá responsabilidat pa promové integridat den un
ambiente atministrativo i sosialekonómiko kompleho. Tambe, nan mester por proba ku nan ta
duna balor na un atministrashon públiko kouteloso, i ku nan ta hasi esfuerso aktivamente pa
kombatí iregularidat. Nan esfuerso personal pa un organisashon íntegro, tantu komo
individuo i komo tim, a yama atenshon positivo. E premio ta konsistí di e imágen di bròns
‘Noortje’, trahá pa Anton Hoornweg, i un suma di plaka pa promové integridat.
Jeaninne Wong-Loi-Sing ta risibí Premio di Integridat Ien Dales 2024
