En konekshon ku e di 43 Konferensia Hefenan di Estado di CARICOM di 3 pa 5 di Juli ku nan vishon di integrashon Karibense I reparashon. Esaki tabata den
kuadro pa buska solidaridat I sosten pa e trajektoria di pone Boneiru bek riba lista di Nashonan Uni I pa konsientisa riba situashon di apartheid ku Bonaire ta eksperensiando despues di e ankesashon illegal dor di Hulanda na 10 oktober 2010 na momento di e disolushon di Antia Hulandes.
Nos por mira bek riba un mishon hopi eksitoso di konsientisashon debi na reunionan, kombersashonan, diskushonan importante ku e Sekretario General di Nashonan Uni, e Sekretario General di CARICOM, ku presidentenan, prome ministernan I lidernan di e Komunidat Karibense. Nos tabatin e oportunidat pa
entrega na nan nos raport rekonose pa Nashonan Uni finansia dor di e pueblo Boneriano:”Investigashon di sufisiensa di propio-gobernashon den konformidat ku normanan internashonalmente rekonose: pais Bonaire” ku a konklui ku nos situashon ta defisiente na tur norma I midi di gobernashon demokratiko.
Ademas nos a komparti e situashon represivo kolonial di nos islanan ruman di Aruba, Korsou, St Maarten, Saba I St Eustatius na e plataforma internashonal aki. Nos a topa I papia ku presidente di Surnam I presidente di CARICOM Chan Santokhi I ku e presidente saliente di CARICOM I Prome Minister di Belize Johnny Briceno, presidente di Guyana Irfaan Ali, prome minister Mia Mottley di Barbados, prome minister di St Vincent I Grenadines Ralph Goncalves
prome minister nobo I hoben di Grenada Dickon Mitchell I hopi otro lidernan mas kaminda nan tur a promete solidaridat I sosten na nos. Un momento historiko I di orguyo tabata e momento pa nos I e pueblo Boneriano tabata ora ku nos a hanja e oportunidat pa papia I entrega e “Investigashon di PropioGobernashon di Bonaire” na Antonio Gutteres Sekretario General di Nashonan Uni.
Nos ta felisita e pueblo di Bonaire ku a kere den nos I ta kontinua sosteniendo nos, ku e stap grandi aki padilanti direkshon di nos trajektoria di pone Bonaire bek riba lista di Teritorionan-sin-PropioGobernashon di Nashonan Uni
