Jadyr a sali di biahe pa nos hermana isla Kòrsou pa representá Boneiru den un kompetensia di Tiru organisá pa klup di tiru Asiento, esaki ta relashoná ku nan 70 aña di hubileo.
E kompetensia di tiru a tuma lugá riba fecha 26 di òktober 2024 na Klup di Tiru Asiento na nan kancha di Tiru situá na Rust & Burgh.
Jadyr a tira den dos disiplina, olimpikó ku kaliber chikitu .22 i tambe kaliber grandi 9mm. Tabatá un honor pa Jadyr por a forma parti di e kompetensia di Tiru representando Tirabon i Bonaire. Esaki sigur ta algu grandi pa Bonaire pa asina nos mustra mundu ku nos tambe por i tin ambishon komo isla chikitu pa e deporte di tiru.
E kompetensia tabatá unu kaminda e partisipantenan ta keda riba nan piá i na nan pòst, i nan ta tira 15 bala for di un distansia di 25 meter usando kaliber .22. Ku kaliber 9mm mester a hasi un kombinashon tirando 15 bala na rudiá, sintá i riba pia. Kada tiradó a haña tempunan límite di 20 sekònde, 1 minüt i tambe 1 minüt ku 30 sekònde pa e tira su kantidat di bala.
Kancha a habri 7or di mainta. Tabata tin partisípashon di miembronan di diferente klupnan di Tiru manera Trigger Curinta, Tirabon, Asiento i Farem. Miembronan di kuerponan harmá manera duana, polisnan di CAP- Curacao Airport Partners, polisnan di refeneriá isla i tambe VKC a partisipá na e kompetensia.
Riba fecha 28 di òktober 2024 i durante di e seremonia di hubileo, a saka e ganadó apsoluto ku a resultá di ta Olievia Leito. Segundo finalista ta Dalila Derna i na di terser luga, Linroyd Petronilia. Tur partisipante a risibí un sertifikado di partisipashon. Despues ku a anunsiá e skornan a sigui ku e parti soshal kaminda ku amentenan di e deporte di tiru i otro invitadónan a sosialisá un ku otro i naturalmente tabata tin algu di pasa boka.
Tirabon ta felisitá klup di tiru Asiento ku nan 70 aña di hubileo, i ta wak pa futuro pa sigui forma parti na mas kompetensia.
Tambe Tirabon ke gradisí e personal di kuerpo polisial Kòrsou, departamentu di Unit Bijzondere Wetten- UBW, spesialmente na yufròu Webster i su team ku a duna di nan banda tur koperashon i sosten nesesario na Jadyr pa ku e partinan legal. Danki pa e tremendo trato profeshonal, servisial i amabel. Esaki sigur ta keda altamente apresiá. Kuerpo polisial Bonaire, departamentu di “Bijzondere Wetten”, BBW tambe naturalmente nos no por keda sin gradisí nan pa e forma rápido di duna bon servisio.
Un Danki hopi grandi nos ke a yama tambe na Fundashon Wega di number Boneiru ku ta e spònser prinsipal, i tambe na Voz di Bonaire pa a hasi ful e biahe aki posibel. Nos ta super gradesido ku ta kere den nos federashon i nos deportistanan.
