Jacinto (Chin) Kelly ta despedi di KPA despues di 41 aña

Ela sirbi su Pais cu tur honor y responsabilidad

Den un ceremonia ameno na Centro di Husticia na Santa Cruz a despedí di Polis onderinspecteur eerste klasse Sr.Jacinto (Chin) Kelly cu a baha cu pensioen bon mereci despues di a sirbi Pais Aruba pa 41 aña. Den presencia di altcomisario di Polis drs. Ramon Arnhem, comisarionan Sra. Irma Gordon y Sr. Robert Candelaria, staf y personal di Infodesk a despedi di Sr. Kelly.

Sr. Kelly a drenta den servicio di Polis riba 16 november aña 1982. E tempo ey tabata Korps Politie Nederlandse Antillen. For di e momento aki a inicia su bunita carera policial dedicando su tempo y su trabou pa sirbi Aruba.

E trayectoria a sigui despues cu ariba 1 november 1987 ela logra bira agent eerste klasse.

Ariba 1 januari 1994 ela wordo promovi pa brigadier. Despues sigui pa 1 november 1994 pa brigadier eerste klasse. 1 november 1998 su carera policial a sigui den rumbo positivo y a wordo promociona cu Hoofdagent. Tabata ariba 1 december 2002 ela bira hoofdagent eerste klasse. For di aki tambe Sr. Kelly su trayectoria a sigui den biento y popa y su deseo di por a sigui crece den e cuerpo a continua. 1 januari 2011 su responsabilidad a bira mas grandi y a wordo promociona pa onderinspecteur. Pa 1 januari 2016 ela bira onderinspecteur eerste klasse t’e cu dia di awe Sr. Kelly ta baha cu pensioen despues di 41 aña cu su ultimo rango di onderinspecteur eerste klasse.

Durante 41 aña ela forma parti pero tambe experiencia diferente departamentonan di Cuerpo Policial Aruba y Antiyas Hulandes manera: Sectie Justitiële Politie Oranjestad (SJPO), Paros Team (RST),  Coördinator SGC – UGC y por ultimo Coördinator Infodesk.

Un trayectoria largo y bunita den un di e departamentonan di mas importante di polis. Sr. Kelly ta laga bunita recuerdonan atras pero pa KPA nos ta perde un persona cu amplio conocimento y un di e pilar nan importante cu hopi conocimento. Sr. Kelly ta un di e personanan cu conoce KPA prome cu Status Aparte y despues di Status Aparte. Un persona cu a mira KPA den su miho y mal momento pero sigur a pone un granito pa asina e organisacion por sigui hisa di nivel.

Di parti staf y persona di Cuerpo Policial Aruba nos kier a yama danki na Sr. Kelly pa su 41 aña di sirbi nos comunidad. Danki na su famia y yuinan pa sostene Sr. Kelly durante su trayectoria policial pero tambe sostene cu locual e semper a gusta! Disfruta di bo pensioen bon mereci Sr. Kelly danki pa sirbi Aruba y danki pa forma parti di Cuerpo Policial Aruba.