Diabierna ultimo, dia 12 di november 2021 a tuma luga un Dia pa Publico na Instituto Pedagogico Arubano cu a hiba e titulo ‘Next Stop … IPA’ y tabatin como lema ‘E destinacion pa crea tur otro profesion’.
E Dia pa Publico tabata un exito. Nos ta satisfecho cu e acohida. E esfera di e anochi tabata uno placentero y e forma con e docente- y studiantenan a activa e bishitantenan tabatin un efecto hopi positivo.
Pa esnan cu no a logra asisti e Dia pa Publico, IPA lo ta presente na e Virtual College Fair. Esaki lo ta dia 17 y 26 di november. IPA ta na turno di 8:00 pa 8:45 di mainta. Subi e pagina di Facebook di Aruba College Fair Foundation pa bo haya e link pa registra.
Riba IPA su website www.ipaaruba.com riba e pagina cu yama ‘Next stop … IPA’ tin video informativo di e director di estudionan inicial, sr. Berthson Boekhoudt cu ta elabora riba e estudio pa Maestro di Enseñansa Primario y tambe un video informativo presenta pa sra. Régine Croes cu ta conta tocante e estudio Bachelor Nederlands als Vreemde Taal.
E videonan aki y tambe mas informacion interesante por wak via di e link directo aki: https://ipaaruba.com/index.php/next-stop%E2%80%A6ipa
Si ta desea di inscribi, tambe por haci esaki via di e website di IPA na e pagina di ‘aanmelden’.
Si tin cualke pregunta, por tuma contacto cu studentenservices@ipaaruba.com of yama 5243100.
