Na Cas di Partido diasabra awo
Den fin di siman boluntarionan a traha masha duro pa prepara Cas di Partido pa e celebracion di Dia di Himno y Bandera. E evento cu tur aña ta tuma luga na e sede di Partido di Pueblo Aruba (AVP), e biaha aki tin un importancia ainda mas grandi. Lider di partido, Mike Eman a resalta cu ademas di e cuminda, wega y ambiente di custumber, mester uni forsa pa defende e Status Aparte cu ta na peliger.
Eman: “Cas di partido ta e sede caminda pueblo por celebra e hecho cu Aruba un biaha mas ta demostra con por uni como pueblo, cu gratitud pa nos grandinan pa Status Aparte y recupera loke Aruba a perde den ultimo añanan na derecho cu hopi generacion a bringa p’e.”
E lider di AVP a sigura cu e partido ta hopi determina pa bringa cu alma y curpa pa e calidad di bida di nos hendenan cu aworaki ta asina afecta pa tur e medida y decisionnan arbitrario cu Gabinete Wever-Croes ta tuma; algo cu ta sinti den tur bario. Mas cu nunca tin mester di union pa defende e causa di e pueblo Arubano.
Eman a menciona e reunion di urgencia cu AVP a yama y tene dialuna ultimo, durante cual a duna hopi informacion, pero tambe a habri oido pa tende e inkietud di hopi ciudadano. Conclusion ta, entre otro, cu costo di bida ta aumentando drasticamente y tin preocupacion riba hopi otro tema den comunidad.
“Pueblo tin falta di perspectiva y liderazgo pa hiba Aruba dilanti. AVP semper a responde na e momentonan mas dificil. Awo mas cu nunca falta e calidad di liderazgo y pueblo ta buscando esey atrobe den AVP,” asina Eman a afirma.
E celebracion diasabra 18 di maart ta ranca sali for di 11’or di mainta y lo bay te cu 5’or di atardi. Ta conseha un y tur pa cumpra nan ticket di cuminda adelanta, pasobra ta conoci cu e ta caba lihe. Por haya esaki na Cas di Partido mes y cerca candidato y otro miembro. Lo tin presentacion di musica en bibo, benta di cuminda, cos dushi y BBQ, ademas di un bar bon surti y e miho ambiente berde berde.
