Kuerpo Polisial ta refutá e insinuashonnan i deklarashonnan infundá, ku djabièrnè dia 4 di
desèmber último, durante di un kontrol di e tim forma pa Polis i M.E.O., a bin topa dos
funshonario Polisial di alto rango ta konsumí alkohòl na un toko durante di lei seku vigente.
Despues di a tuma nota di deklarashonnan hasí durante di un entrevista na un emisora lokal
djadumingu último, den kua e inspektor di M.E.O. a konfirmá ku a topa dos funshonario
polisial di alto rango na un toko ta konsumí alkohòl, maneho di Kuerpo Polisial a kuminsá
inmediatamente ku un investigashon.
Durante di e investigashon aki, ku tabata na enkargo di e departamento di asuntunan
interno (B.I.Z.), a skucha entre otro:
E doño di e toko en kestion;
E inspektor di M.E.O. ku a hasi e deklarashon.
E personal di M.E.O. ku tabata presente durante di e kontrol;
E polisnan ku tabata presente durante di e kontrol.
Banda di e interogashonnan aki, a wak grabashonnan tambe di kámara ku tabatin na e toko.
For di tur e deklarashonnan di e personanan ku a keda skuchá, a sali na kla ku ningun
momentu, e dos funshonarionan tabata na e toko en kuestion ni a bishita e toko promé ku
e tim di kontrol a yega.
E funshonarionan aki tabata na un lugá di laba outo ku ta keda algun desenas di meter for
di e toko na kua ta referí.
Riba e grabashon tampoko por a tuma nota presensia di e dos funshonarionan na e toko i ni
sikiera den e besindario direkto di e toko.
Konklushon di e investigashon ta pues, ku ningun momentu e dos funshonarionan aki a hasi
nan mes kulpabel na violashon di ningun regla vigente i sigur no a demonstrá un aktitut di
no tabata ehemplar den nan funshon komo hefenan di polis.
Maneho di Kuerpo Polisial ta lamentá profundamente, e echo ku di un forma sumamente
deskuidá, a mancha nòmber di su miembronan i konsekuentemente tacha integridat di e
kuerpo.
E deklarashonnan inkorekto di un fuente ofisial, tabata motibu di repudio total den henter
komunidat i a trese ku n’e hopi insulto entre otro riba medionan sosial na e personanan
konserní.
Kuerpo Polisial ta spera ku e situashon aki no ripití mas, pasobra no ta fásil, sigur den un
komunidat chikí manera esun di nos, pa esnan afektá sigui dilanti den bida ku un sikatris ku
nan no a sòru p’e.
Finalmente, maneho di Kuerpo Polisial ke enfatisá, ku di e mesun forma ku e ta para pa
kualke miembro ku faya ku lei òf reglanan di e kuerpo, tin ku karga e konsekuensianan di
esaki, di e mes manera lo e sali tambe pa kualke miembro ku ta ser tildá òf akusá di un of
mas echo, si despues di investigashon resultá ku e no ta enbolbí den algu robes.
