Durante e siman di 11 di aprel 2021, miembronan di Nature Foundation St. Maarten, Dutch Caribbean Nature Alliance (DCNA), Saba Conservation Foundation (SCF), i Beneath the Waves a hasi múltiple ‘prueba sientífiko inisial’ komo parti di e proyekto di “Shark Shakedown”. E ekspedishon di investigashon tabata parti di un investigashon mas amplio di tribon tintorero den e region ku fondo di World Wildlife Fund for Nature di Hulanda (WWF-NL) pa medio di e Fondonan pa Biodiversidat i Nationale Postcode Loteria di Hulanda. E investigadónan a kapturá diesun tribon i a duna nan un marka, inkluso pa di promé biaha un tribon tintorero na estado i un tribon di ref Karibense ku ta un espesie ku ta kore peliger di ekstinshon na Hulanda Karibense. E datonan lo duna informashon vital pa strategianan di konservashon pa no solamente St. Maarten, pero pa hinter e region amplio di Karibe.
E ekspedishon a dura sinku dia durante kua a kapturá diesun tribon i a duna nan un marka, inkluso tribon di santu (‘Ginglymostoma cirratum’), tribon di ref karibense (Carcharhinus perezi), i tribon tintorero (Galeocerdo cuvier) variando di espesie sup-adulto pa adulto.
E partisipantenan a haña un training den práktika ku ekspertonan di ‘Beneath the Waves’ komo preparashon riba e ekspedishon pa Saba Bank na ougùstùs 2021. Meta di e ekspedishon benidero ta pa determiná si Saba Bank ta un área di kuna pa tribon tintorero den Ost Karibe. E teknologia ultrasóniko di kalidat haltu ku e tim a usa, ta kreá pa E. I. Medical Imaging i e kolaboradó Dr. James Sulikowski, di Universidat di Estado Arizona, a hasi trabou di pionero ku esaki. A hasi uso di e teknologia akí den identifikashon di e estado di madures i di e etapa di embaraso di vários espesie di tribon, pa di promé biaha den region komo prueba sientífiko inisial den siensia di tribon.
E sientífikonan eksitosamente a registrá estado inisial di embaraso serka un tribon tintorero muhé adulto i tambe nan a pega un transistor di satélite na e tribon muhé akí durante nan seshon di training den práktika. Hasiendo uso di siguimentu di moveshon di e tribon via e transistor di satélite durante e próksimo lunanan binidero, e sientífikonan ta spera di por konfirmá evidensia ku Sint Maarten ta un sitio di kuna pa e animalnan akí, ku globalmente ta den menasa di ekstinshon. Den un otro prueba sientífiko inisial e Sientífiko Prinsipal di ’Beneath the Waves’, Dr. Austin Gallagher, a pone e promé marka ku kámara na un tribon tintorero den Hulanda Karibense. E tim eksitosamente a kita e ekipo di kámara for di e tribon durante e ekspedishon, i e tribon akí a produsí resultado prometedor pa loke ta trata su aktuashon den e region akí.
Tantu e transistor di satélite komo e marka ku kámara a demostrá ku e tribon tintoreronan akí ta preferá di biaha den e área entre St. Maarten ku St. Barths; sinembargo, esakinan ta solamente e promé opservashonnan. No por saka konklushon ainda pa loke ta trata moveshon di e animal akí.
E informashon ku e investigashon akí ta produsí lo duna un mihó komprondementu di e importansia di tantu e status di tribon den awanan teritorial di Sint Maarten i den Yarari Santuario komo ku e papel ku e ekosistemanan akí tin den siklo di bida di tribon tintorero den e área mas amplio di e region Karibense. Tribon tintorero aktualmente ta kai bou di e kategoria ‘Kasi bou di Menasa’, di International Union for Conservation of Nature, miéntras ku a kambia e kategoria di tribon di ref Karibense resientemente pa ‘Den Peliger di Ekstinshon’. Tribon ta tuma un posishon klave den mantenshon di e balansa den e ekosistemanan marino lokal i regional; i den mantenshon di biodiversidat i pa e motibu akí nan protekshon ta krusial.
Bishitá Dutch Caribbean Nature Alliance su Facebook, Instagram (dcnanature) òf DCNA su wèpsait (https://dcnanature.org/news/) pa haña mas informashon tokante e proyekto “Shark Shakedown” i e siguiente ekspedishonnan di tribon.
*Nota di rechaso/’Disclaimer’* Apesar ku ainda nos ta meimei di un pandemia, e partnernan di e proyekto akí a hasi nan empeño pa sigurá ku tur partisipante tabata seif pa traha huntu ku otro i pa kontinuá ku e trabou importante di konservashon di naturalesa na Hulanda Karibense.
Pa mas informashon por fabor tuma kontakto ku Dutch Caribbean Nature Alliance via imeil info@dcnanature.org òf telefòn +599.717.5010.
