Dentro di poko riba enkargo di Selibon ta bai hasi un investigashon mas amplio relashoná ku e impakto di kimamentu di shushi den bisindario di Lagun. Entidat Públiko Boneiru ta sostené e investigashon akí. Anteriormente Ecovision a hasi un investigashon eksplorativo riba enkargo di Selibon i Entidat Públiko Boneiru a fasilitá esaki. Esaki en konekshon ku e kehonan persistente di habitantenan di den bisindario direkto.
Entidat Públiko Boneiru ta tuma e kehonan akí hopi na serio i ta pone salubridat públiko sentral komo e aspekto mas importante. Durante e investigashon eksplorativo i antisipando riba e investigashon mas amplio ku nan ta bai ehekutá, a para e kimamentu di shushi. Ku bista riba interes di e habitantenan di den bisindario, e meta ta pa na promé lugá identifiká e situashon kompletamente i despues tuma e medidanan nesesario.
Dia 5 di aprel Entidat Públiko Boneiru a papia ku señor John Janga, presidente di Asosiashon Pro Lagun i den e kòmbersashon akí a enfatisá ku Entidat Públiko Boneiru ta tuma e situashon hopi na serio i ke haña un solushon struktural pa tur partido. En konekshon ku esaki for di Entidat Públiko Boneiru a manda un karta informativo pa miembronan di Asosiashon Pro Lagun. A palabrá ku Entidat Públiko Boneiru lo informá e habitantenan di den bisindario regularmente i ku lo enbolbí nan ku e pasonan di kontinuashon.
Ta na interes di e habitantenan di den bisindario direkto pa bini klaridat. Pa e motibu akí Entidat Públiko Boneiru ta duna prioridat na e investigashon i tumamentu di e medidanan nesesario. E habitantenan di den bisindario ta e proménan ku ta risibí informashon den un forma direkto tokante e konklushonnan i resultado di esakinan.
