KRALENDIJK,Bonaire
No por atribuí e partisipashon abou na elekshon di 20 di mart (64% kontra 78% na aña 2015) na un solo kousa spesífiko i ademas e ta den liña ku un tendensia mundial.
Pa gezaghebber Edison Rijna e porsentahe di partisipashon i e echo ku tabatin kestion di un tempu di warda hopi largu na e urnanan elektoral tabata motibu pa laga un instansia independiente investigá e kousanan ku e meta pa a base di e resultadonan tuma medidanan dirigí pa e elekshonnan binidero. Inter Continental University of the Caribbean (ICUC) a hasi e investigashon. Pa e investigashon ICUC a entrevistá 209 votadó i no-votadó i tambe un kantidat grandi di persona ku tabata enbolbí ku organisashon di e elekshon.
Puntonan di mehorashon
A base di e investigashon tin puntonan di mehorashon a bini dilanti ku ta varia hopi pa loke ta trata nan índole. 9% di e votadónan no a risibí nan karchi di vota na kas. 84% di e votadónan ku a bai buska nan karchi di vota a eksperensiá e tempu ku nan mester a warda komo ‘un tiki largu’ te ‘largu’. E kampaña di informashon a haña un evaluashon positivo. El a kana bon entre otro danki na uso di medionan sosial ku entre otro e wèpsait ‘Boneiru ta vota’, pero e tabata kòrtiku. Mayoria votadó no a eksperensiá e echo ku tabatin dos elekshon pareu – di Konseho Insular i di Tweede Kamer – komo algu ku a trese bruashon.
Segun e dia di elekshon tabata pasa e tempu pa warda tabata bira mas largu. Pa motibu ku 49% di e votadónan a bai vota den e último 3 oranan, despues di 17.00 ‘or a surgi karedanan largu di hende ku tabata warda na e urnanan elektoral. E registrashon adelantá i e kantidat relativamente grandi di votadó ku un òf mas vòlmagt tambe tabata kousa di e karedanan largu di hende ku tabata warda. Pa 9% di e votadónan e tempu pa warda a subi bira te mas ku 2 ora largu. E influensia ku esaki tabatin riba e kantidat total di voto a resultá di ta tiki.
Rekomendashonnan
E investigadónan di Inter Continental University of the Caribbean ta rekomendá entre otro pa reinforsá e kordinashon entre urna elektoral prinsipal i e urnanan elektoral i komunikashon interno, mehorá distribushon di karchi di vota, entrená e trahadónan na e urnanan elektoral mas intensivo, hasi uso di mas kòmpiuter na e urnanan elektoral, deskurashá uso di vòlmagt i mira si no por influensiá baimentu di urna elektoral di tal manera ku esaki por tuma lugá na un manera mihó plamá riba henter dia, por ehèmpel pa medio di indiká ku mas énfasis na votadónan i doñonan di trabou ku mester pèrmití trahadónan a base di lei pa vota bou di ora di trabou. Mas aleu, segun e investigadónan, lo ta bon pa trata na engrandesé enbolbimentu di hóbennan ku polítika, entre otro pa medio di desaroyo di un pakete di lès pa nos skolnan.
Opservadó
E delegashon di Organisation of American States (OAS) ku a sigui e proseso di elekshon, tambe a emití un rapòrt. Durante dia di elekshon e miembronan a bishitá tur e 10 urnanan elektoral i e urna elektoral mobil, pero tambe a papia ku un kantidat grandi di e personanan enbolbí, manera representantenan di e partidonan partisipante, Kámara di Komèrsio etc. Entre otro e delegashon ta hasi menshon di e ‘dedikashon spesial’ ku kua e miembronan di e urnanan elektoral tabata ehersé nan tareanan minusiosamente. Aksesibilidat di e urnanan elektoral tabata bon (pa usuarionan di ròlstul tambe).
E opservadónan a denominá uso di kòmpiuter i di un urna elektoral mobil komo un ‘ekspreshon di inovashon’. ‘Posibelmente den desaroyo mas aleu di e inovashonnan aki por buska koperashon ku munisipionan hulandes. Di e manera ei Boneiru por siña di eksperensianan di otronan i vise vèrsa’, segun e delegashon ku a sugerí pa hasi uso di un ‘toolkit’ ku nan ta usa na Hulanda Oropeo na Boneiru tambe, adaptá na e situashon lokal. Otro rekomendashonnan ta: sòru pa tur medio di komunikashon ta disponibel na papiamentu tambe i pone e kolónan di kada partido i potrèt di e kandidatonan riba e papelnan di vota.
Reakshon di gezaghebber
‘E manera ku kosnan a bai durante e dianan promé ku elekshon i riba e dia di elekshon mes tabata un motibu pa mi duna òrdu pa hasi un investigashon. Tantu e investigashon di Inter Continental University of the Caribbean komo e konklushonnan di e delegashonnan di OAS i fitbèk di e personanan ku tabata enbolbí ku organisashon di e elekshon a resultá den algun punto di mehorashon útil i práktiko’, segun gezaghebber Edison Rijna. ‘Mi ta bai den konsulta ku e partidonan enbolbí i den kurso di e aña aki mi lo presentá un plan di aserkamentu pa sòru ku den futuro e elekshonnan ta kana adekuadamente. Den esei tin dos aspekto ku tin mi atenshon spesial: entrega di karchi di vota i e tempu ku tin ku warda pa vota. Banda di esei e rekomendashon pa wak kon por enbolbí prinsipalmente hóbennan ku polítika ta netamente loke mi tambe ta deseá. Kisas a bira tempu pa bini ku un vershon djuniòr di Konseho Insular.’
ReunionGezaghebber Rijna a manda e relato di investigashon i e konklushonnan di e delegashon di opservadó pa Konseho Insular. Ta su intenshon pa dentro di poko tene un reunion pa tur partido ku a partisipá na elekshon pa papia tokante e konklushonnan i e rekomendashonnan.
