Proximamente lo inicia cu un investigacion encuanto di e.o. e interes pa literatura Arubiano. E investigacion aki lo abarca e diferente actornan riba tereno literario. Cada un di e instancianan cu tin di haber cu literatura, sea ta pa mucha, hoben of adulto lo ricibi despues pa dia 21 di februari un invitacion pa participa na e investigacion aki. E survey cu cada autor/instancia lo ricibi, ta contene un cantidad di preguntanan pa contesta. A base di e contestanan lo procesa esaki y pone nan den un contexto cientifico. Di e manera aki por haya sa tambe kico tur a haci caba na e infrastructura literario, con esaki ta funcionando y locual cu falta ainda pa haci.
E investigacion aki a bira necesario, debi cu durante añas tin yen di fluctuacionnan riba dicho tereno. Hopi ta ser papia, pero poco ta wordo concretisa of no tin un liña di accionnan cu ta indica cu tin un proceso continuo. Como cu literatura ta e wes’i lomba di un sociedad, ta bon pa wak con esaki ta wordo sostene. Por ehempel mester tin un fondo cu ta yuda autornan financia nan publicacion. Kisas ta bon pa cada 5-10 aña monitor e desaroyonan pa wak e cambionan den transcurso di tempo y kico e stake-holdersnan por contribui pa mehora e situacion. For di e prome reaccionnan por bisa cu e interes ta enorme y cu e idea pa un investigacion a ser ricibi cu hopi entusiasmo.
Den etapa e diferente actornan lo ricibi e survey pa contesta e preguntanan. Den un rato (30-45 minut) por yena e cuestionario. E intencion ta pa na luna di december presenta e resultado di e investigacion. Pa cu esaki lo organisa un anochi unda tur esnan participando riba e tereno literario, tin e oportunidad pa entercambia di idea cu otro a base di e conclusionnan di e investigacion. Y pa yega na un plan di accion pa – conhuntamente cu otro instancianan y gobierno – ehecuta esaki. Esnan cu tin por lo menos 1 buki publica y kende no a ricibi e survey pa dia 21 di Februari, por laga registra nan nomber via survey.literatura@gmail.com y lo ricibi e formulario pa participa na e investigacion.
E investigacion aki ta ser dirigi y lo ser ehecuta pa sr. Quito Nicolaas. Den pasado sr. Nicolaas a forma parti di e Socio-Economic planning group di DECO na Aruba y tin hopi conocemento con pa conduci un investigacion. Na vispera di Status Aparte el a contribui – bou di guia di E. Nieuhauser di United Nations Development Program (UNDP) na e prome Plan Nacional di Desaroyo pa Aruba. Tambe den su trayectoria el a yega di haci investigacion riba tereno cultural. Awendia sr. Quito Nicolaas ta mas conoci como autor di diferente buki rond mundo y kende a duna charla na diferente pais. Pa su ensayonan y demas publicacionnan sr. Nicolaas na 2022 a ricibi di Rey Willem Alexander di Hulanda un condecoracion den e Orden di Officier di Oranje Nassau.