Kivi Kring Caribbean ta organisa su di dos actividad di e aña aki cu tin como tema:
Universidad di Aruba den colaboracion cu KU Leuven (Universidad Catolico di Leuven – Belgica) ta anfitrion di e programa di SISSTEM. SISSTEM ta para pa “Sustainable Island Solutions through Science, Technology, Engineering and Mathematics” cu ta wordo financia door di Comunidad Europeo. Entre otro SISSTEM ta encera un posibilidad pa cu 11 proyecto pa haci investigacion scientifico ariba e tereno di desaroyo sustenible pa cu estadonan insular chikito manera Aruba. A base di e investigacion scientificonan aki e investigado por haya su grado di doctor (PhD).
Un di e candidatonan ta Ir. Diego Acevedo cu tin un grado di Bachelor of Science den ingenieria mechanico (magna cum laude) di Universidad di Florida na USA y un grado di Master of Science den tecnologia di energia sustenibel di Universidad Tecnico di Delft na Hulanda. Diego a traha antes ariba e tereno di tecnologia inovativo pa desaroya energia maritimo, red di refigeracion di distrito, produccion di awa potable y produccion ariba lama di energia solar.
Contenido di su presentacion
Na Aruba Water – en Energie Bedrijf (WEB) ta uza e tecnologia di “reverse osmosis” cu membraan pa traha awa potable sacando e salo for di awa di lama. E descargo di e tecnologia aki ta un awa masha concentra di salo cu ta wordo yama “brine”. Awor aki esaki ta wordo descarga den laman pero figura bo si e brine aki wordo considera como un fuente di mineralnan cu por wordo recupera? Y esaki exactamente ta loke e investigacion di Diego Acevedo ta encera. Pasobra den e brine aki tin substancianan cu ta scars na mundo pero cu por wordo recupera economicamente. Por pensa ariba e substancianan manera Magnesium y Lithium cu tin un mercado internacional pa nan. Esun especial cu tin hopi pregunta pe y cu ta scars awor ta Lithium cu ta wordo uza den baterianan pa carga y warda electricidad sustenible pa auto, cas etc. Tambe por pensa ariba Chloor cu por wordo produci di salo, cu kimicamente ta wordo yama Natriumchloride. Mundialmente tin diferente gruponan scientifico cu ta haciendo e mesun investigacion aki. Asina ta tin un competencia andando pero tur ta yuda otro si. Y Diego Acevedo ta den e red scientifico aki conhunto cu esnan den e teranan di Comunidad Europeo rond di e lama Mediterraneo.
KIVI KRING Caribbean ta invita tur ingeniero pa asisti na e presentacion aki pa engrandece e sabeduria cu un tema innovativo aki cu ta pone e ingeniero waak “out of the box”. E actividad lo tuma luga dia 31 di maart 2022 den Aula di Universidad di Aruba di 6:30 te cu 7:30 p.m. sigui pa un encuentro di 7:30 te cu 8:30 pa siña conoce otro of discuti mientras gozando di un drink y snack. Pa cubri e gastonan e entrada ta 25 AWG florin pa participante. Por registra via e link aki: Kring Caribbean | KIVI.
