Riba 22 di augustus 2020 Aruba a wordo sacudi pa un noticia den prensa tocante lekmento dor di DVG (Departamento di Salubridad Publico) di informacion confidencial di pacientnan di COVID. Riba Whatsapp un lista tabata circulando di pacientnan cu a wordo getest positivo pa COVID. Director di DVG a haci denuncia riba 24 di augustus 2020 di violacion di secreto profesional (ambtsgeheim).
Aunke a tene cuenta desde prome momento cu un eror humano lo por a wordo cometi, Cuerpo Policial di Aruba a start un investigacion bao guia di fiscal di Husticia. Esaki pa haya sa si a lek informacion confidencial y ken a lek y si tabata intencionalmente of no.
Den e investigacion a scucha 2 persona como sospechoso y 8 persona como testigo. E investigacion a keda cla na luna di Mei ultimo y entrega na Ministerio Publico.
E investigacion a mustra cu un di e sospechosonan a berdad manda informacion confidencial pa un e-mail robez. Esaki a bay accidente. E acto aki, esta e ekivocacion, no ta hiba na sospecho di un hecho castigable, manera ta para describi den articulo 2:232 di Codico Penal (Wetboek van Strafrecht). No por papia di intencion. E caso a bira un sepot.
Un di dos persona cu a wordo considera un sospechoso, a resulta di a wordo incorectamente marca como sospechoso. E caso aki tambe a bira un sepot.